Temsîlkaranê DFG û MKG’yî Rojnameger Necmettîn Salazî serrgêra wefatê ey a diyîne de mezeala ey ser o, ey ard xo vîr.
Komela Rojnamegeran a Dîcle Firatî (DFG) û Komela Rojnamegeranê Cinî ya Mezopotamyayî (MKG) Rojnameger Necmettîn Salaz ke 14ê teşrîna verêne ya 2023 de şaristanê Silêmanî de şibi heqîya xo, serrgêra wefatê ey a diyîne de mezela ey ser o ey ard xo vîr. Keyeyê Salazî, Platformê Sazgehanê Demokratîk, hemşaredarê Şaredarîya Wanî ya Şaristanê Girdî Neslîhan Şedal û Abdullah Zeydan û Dayîlê Aştî beşdarê merasîmê vîrardişî bîyê.
‘Ey mîrasêko erjaye ma rê verda’
Merasîmê vîrardişî bi deqîqeyêk rêzgirewtişî reyde dest pêkerd. Rêzgirewtişî ra pey nameyê DFG’yî ser o Bazîd Evrenî qisey kerd û dîyar kerd ke têkoşînê kurdan xeylê kesayetê erjîyayeyî vetê orte, înan ra yew zî Necmettîn Salaz bi. Bazîd Evren da zanayene ke Necmettîn Salaz kesêko berhemdar û afernayox bi û vat: “O şorişgir, rojnameger û nuştoxêko erjîyaye bi. Demanê zehmetan ra vîyart la vindertişê xo yo şorişgirî ra qet tawîz nêda. Rixmê heme zehmetîyan zî Mamoste Necmettîn kar û xebatê xo domnayê. Ey mîrasêko erjîyaye ma rê verda. Ma do wayîrê mîrasêko ey ma rê verdayo, vejîyê û bidomnê.”
Dima ra Hemserekê DBP’yî yê Wanî Cemal Demîr qisey kerd û dîyar kerd ke rojnameger her tim seba ke rastîyan tarî de nêverdê, benê hedef. Cemal Demîr keye û çapemenîya kurdî rê serweşîye waşt û Necmettîn Salazî ard xo vîr.
Cuya Necmettîn Salazî
Birayê Necmettîn Salazî, Kadîr Salazî bi vatişê cuya birayê xo dest bi qiseykerdişê kerd û wina vat: “Necmettîn demê têkoşînê şorişgirî yê Wanî de xeylê sazgehan de xebitîya. Hepisxaneyê Amed de sîyasetê kurdî nas kerd û têkoşînê xo înan reyde domna. Dima şi Helebçe û uca ra û Silêmanî ra hes kerd. Uca de nêweş kewt. Verê ke cuya xo vîndî bikero vat, ‘Wa cenetê heme dînanê pîroz ê to bo. Di metre erdê Goristnaê Akkopru yê Wanî mi rê bes o.’ Ez ey bi rêzdarî ana xo vîr.”
Merasîmê vîrardişî bi ronayîşê qerenfîlan qedîya.
