Çalakvanên beşdarî daxuyaniya şermezarkirina destpêkirina komploya 9ê Cotmehê ya li dijî Rêberê Gelê Kurd Abdullah Ocalan bûn destnîşan kirin ku demildest pêwîstî bi azadiya fizîkî ya Abdullah Ocalan heye.
Duh bi pêşengtiya Platforma Saziyên Demokratîk a Amedê de destpêkirina komploya navneteweyî ya di 9ê Cotmeha 1998an de li dijî Rêberê Gelê Kurd Abdullah Ocalan pêk hatibû, li Qada Şêx Seîd hate şermezarkirin. Bi sedan welatî tev li çalakiyê bûn. Welatiyên tev li çalakiyê bûn têkildarî rewşa Abdullah Ocalan axivîn.
‘Em ê li ser rêça Rêberê Gelê Kurd bimeşin’
Xebatkara Komeleya Çandê ya Dîcle Firatê Herem Nergîz bal kişand li ser polîtîkayên tunekirina gelê Kurd û got: “Çi kirin jî lê em tune nebûn. Em ê her tim li ser rêya Rêberê Gelê Kurd Abdullah Ocalan bimeşin. Ne tenê îro me di vê tekoşînê de gelek bedel dan. Ji bo zimanê xwe, ji bo hebûna xwe û ji bo yekîtiya gelê Kurd. Daxwaza wan ew bû ku bi dagirkeriyê me tune bikin. Lê belê çiqas wisa dikin hêrsa me mezintir dibe. Armanca me ya herî mezin ew e ku em dê oxira azadiyê de canê xwe feda b ikin. Bi salane li her qadan têkoşîna me didome. Em soz didin em ê li ser rêça Rêberê Gelê Kurd bimeşin.”
‘Em ji bo azadiya Rêberê xwe li vir in’
Hevserokê Rêxistina DEM Partiyê ya Navçeya Farqînê Mafuz Kizilduş anî ziman ku paradîgmaya Rêberê Gelê Kurd Abdullah Ocalan li Tirkiyê û Rojhilata Navîn alternatîfan ava dike û wiha got: “Îro em li vê derê ji bo komploya li ser Rêberê Gelê Kurd Abdullah Ocalan pêk hatibû şermezar dikin. Ev komplo li dijî nêrîn û paradîgmaya Serok pêk hat. Rêberê Gelê Kurd bi ramanên xwe ji bo Tirkiyê û Rojhilata Navîn alternatîf ava kiriye, ji bo mirovahiyê fikir û ramanên herî baş derxistiye holê. Em îro ji bo azadiya Rêberê xwe li vê derê ne. Em dixwazin Rêberê xwe di nav gelê xwe de bibînin.”
‘Em dixwazin Rêberê xwe di nav xwe de bibînin’
Hacer Kurt jî diyar kir ku ew dixwazin bi awayekî lezgînî Rêberê Gelê Kurd Abdullah Ocalan bigîhîje azadiya xwe û got: “Em dixwazin êdî di nav gel de be. Em ê ji bo azadiya wî dengê xwe bilindtir bikin. 9ê Cotmehê roja destpêkirina komploya navneteweyî ji bo me roja reş e. Em dibêjin bila ev komplo biqedin û bila serokê me azad bibe. Divê ji bo pêşxistina aştiyê Rêberê Gelê Kurd bi gel re be. Bila were Meclîsê ku em aştî û demokrasiyê ava bikin.”
Halîse Nergîs jî hestên xwe anî ziman û got: “Bila êdî tu dayik negirîn, bila ciwan nemirin. Em azadiyê dixwazin, Serokê me çi dixwaze em jî wê dixwazin.”
