Komên paramîlîter ên girêdayî Tirkiyeyê di serdegirtina konê sersaxiyê yê li gundê Kefer Sefrê yê Efrînê de girt, 3 ciwan revandin û ber bi cihekî nediyar ve birin.
Li gorî nûçeya ANHAyê; komên paramîlîter ên girêdayî dewleta Tirk şevê din bi 5 erebeyan bi ser konê sersaxiyê yê li gundê Kefer Sefrê yê bajarê Cindirêsê yê Efrînê de hatiye vedan, girtin û 3 ciwanên tev li merasîma sersaxiyê bûne revandin.
Çavkaniyên xwecihî da zanîn ku ji ber tirsa astengî û gefan malbatên ciwanan navên wan eşkere nekirin.
Li gorî hin agahiyên ji deverê hatin girtin, 6 kes ji şêniyên taxa Şêxmeqsûdê ya bajarê Helebê berê xwe dabûn Kefer Sefrê ku sersaxiyê bidin xizmên xwe. Lê di bin konê sersaxiyê de çeteyan 3 kes ji wan revandin.
Ev binpêkirin, piştî 3 rojan ji talaniya li gundê Bozikê yê bajarê Cindirêsê yê Efrînê ku çekdarên rûpoş ên girêdayî dewleta Tirk pêk anîbûn, pêk tê.
