Şirnex – Hevşaredara Hezexê Turkan Kayir ku DEM Partiyê ew îxrac kiribû av neda mala şînê ya ku malbata endamê HPGê Abbas Kerîm Vesek lê şîn danîbû.
Hevşaredara Hezexê Turkan Kayir ku ji ber ne li gorî exlaqê partiyê tevgeriyaye ji aliyê Partiya Wekhevî û Demokrasiyê ya Gelan (DEM Partî) ve hatibû îxraçkirin av nedayê mala ku şîn lê hatiye danîn. Malbata Abbas Kerîm Vesek (Hasan Viyan) ku li Herêmên Parastina Medyayê di şer de jiyana xwe ji dest dabû, piştî ragihandina HPGê li Mala Şînê ya Ahmedê Manco ya li Taxa Nû ya Hezexê şîn danîbû. Malbatê tevî ji karmendên şaredariyê av xwestiye jî şaredariyê av nedaye. Hat zanîn ku rayedarê şaredariyê ji bavê Vesek, Yûsûf Vesek re gotiyê wan li ser biryara Turkan Kayir av nedaye û diyar kiriye ku ew ji ber ji şaredariyê ditirse nikare avê bide.
Yûsûf Vesek, diyar kir ku demeke dirêj e li taxê pirsgirêka avê heye û wiha got: “Ji ber ku ez rêveberê DEM Partiyê me Turkan Kayir cûdakariyê li me dike. Heke kesekî din bixwaze, ew digihîne. Li taxên din av heye lê li ya me tune ye. Ji bo êdî kes netirse min li mala şînê sersaxî qebûl kirin. Tevî ku midûriyeta polîsan li min geriya û sersaxî xwest û got pêdiviyeke wê heye jî ji ber ku şaredarî tirsiya av neda.”
Malbata endamê HPGê Ramazan Çakarsin ku di 1998an de li Wanê di şerekê de jiyana xwe ji dest dabû û piştî ragihandina HPGê ya şehadeta wî malbatê di 12ê Tirmehê de li taxa Turgut Ozal şîn danîbû. Hate zanîn ku Şaredariya Hezexê av nedaye vê malbatê jî.
