Şirnex – Malbatên endamên PKKê yên di merasîma 11ê Tîrmehê de cih girtîn axaftin û gotin PKKê gava xwe avêt êdî divê dewlet jî gav biavêje.
Piştî banga Rêberê Gelê Kurd Abdullah Ocalan a Aştî û Civaka Demokratîk ku 27ê sibatê kiribû PKKê bi kongreya xwe ya 12mîn biryara feskirina partiya xwe da. Her wiha bi banga Ocalan a 19ê hezîranê ku bi dîmen kirîbû û di 9ê Tîrmehê de hat parvekirin, PKKê di 11ê Tîrmehê de li Şikefta Casenê ya li Silêmaniya bi tevlîbûna 30 gerîlayan bi navê Koma Aştî û Civaka Demokratîk merasîma çek îmhakirinê pêk anî. Piştî merasîmê agahiyên gerîlayên tev li çek îmhakirinê bûne hatin weşandin û hate hînbûn ku ji wan gerîlayan Şerîfe Tekîn (Diljîn Rûken) û Îzzettîn Ersoy (Kendal Egîd) ji Gundê Hespist ê navçeya Hezex a Şirnexê ne. Dayîk û bavên gerîlayên PKKê Tekîn û Ersoy ji ajansa me re axaftin.
Divê tenê ne em gav biavêjin
Dayîka Îzzettîn Ersoy, Şerîfe Ersoy diyar kir dema wan dîmen temaşe kirin, gelekî hestiyar bû û got: “Me bi çavê xwe dît çekên xwe şewitandin. Piştre çûne cihê xwe. Gere êdî dewlet jî destê xwe biavêje vê meseleyê. Ne em tenê gav biavêjin. Bila êdî tu kes neyê kuştin û em bibin xwîşk û birayên hev.”
Bav Hasan Ersoy jî bi lêv kir ku ger dewleta Tirk ber bi aştiyê ve gav neavêje ew ê zerarê bibîne û got: “Dewleta Tirk were rayê jêre karekî gelek baş e. Ev yek ê gelek fêde bide dewletê jî. Ger neyê rayê dê di Rojhilata Navîn de têk biçe.”
PKKê destê aştiyê dirêjî dewletê kir
Hasan Ersoy da zanîn ku gelê Kurd xwedî li gotinên Abdullah Ocalan derdikeve û axaftina xwe wiha bi dawî kir; “Banga Ocalan kirî gaveke wisa ye ku hew çêdibe. Gelê Kurd jî qenç e û dibêje lihevtina me ya bi dewletê re li ser Îmraliyê ye û bi Serok e. Gel dibêje bê Serok jiyan nabe û bê Serok aştî jî nabe. PKKê bi vê gavê destê xwe yê aştiyê dirêjî dewletê kir. Êdî divê ew jî destê xwe dirêjî PKKê bikin.”
Bila dewlet vê gavê boşê bernede
Bavê Şerîfe Tekîn, Mehmet Tekîn jî anî ziman ku merasîma PKKê pêk anî ji aliyê herkesî ve erênî hate dîtin û wiha axivî; “Li gor me temaşe kirî û dinya dibêje, gaveke zaf spehî bû. Divê dewlet jî vê gavê boşê bernede. ji kuştinê kes xelas nabe û ji kuştinê kes serfiraz nabe. Xweşî gelekî xweş e. silha xweş, xweş e.”
Bila Erdogan û Serok aştiyê pêk bînin
Bav Mehmet Tekîn di berdewama axaftina xwe de got ku divê êdî dewlet kurdan nas bike û pirsgirêkên wan çareser bike.
Dayîka Şerîfe Tekîn, Hediye Tekîn jî diyar kir ku wê jî merasîma PKKê temaşe kiriye û wiha axivî; “Divê êdî dewlet jî aştiyek xweş pêk bîne. Bila Erdogan û Serok aştiyek baş pêk bînin.”
