Şirnex – Nevzet Ozturk ê ku 30 salan di zindanê de ma û hat berdan diyar kir ku bi dawîkirina şerê çekdarî re kar û xebat zêdetir bûye, mîrasî heyî jî ew ê bi azadiyê tacîdar bikin û li ber têkoşînê dewlet neçare gavan biavêje.
Rêberê Gelê Kurd Abdullah Ocalan di hevdîtinên xwe yên bi Heyeta Îmraliyê re derbarê zindanan de axaftibû û gotibû di vê pêvajoyê de barê giran dikeve ser milê kesên 30 salan di zindanan de man e. Nevzat Ozturk ê ku di sala 1992an de li Stenbolê hatibû girtin di sala 2023yan de hatibû berdan. Ozturk derbarê gotinên Ocalan û pêvajoyê de ji ajansa me re axivî.
‘Em xwe bi rêxistin bikin’
Ozturk got ku peyama Rêberê Gelê Kurd Abdullah Ocalan ji bo girtiyên 30 salî şandibû zelal e û wiha dest bi axaftina xwe kir: “Ev peyam gelekî girîng e. Êdî em çiqas dibin bersiv ew bi me ve girêdayiye. Wate dayîn gelekî girîng e. Peyama ku Ocalan dayî kurt e lê naveroka wê gelek tije ye. Çima pêdivî dît peyamek wiha bide. Ji ber ku di aliyê rêxistînî, aliyê şêwazê, aliyê rêbaz de pirsgirêk hene. Ew qas bedel hatine dayîn, ew qas êş hatiye kişandin, îro nabe ku mirov van ji bîr bike û li gor wê tevnegere. Li gorî peyama hatî dayîn divê em bi her awayî xwe bi rêxistin bikin û divê bersivdayînek hebe. Bersivdayîn jî bi xebatê ye, bi rêxistinkirinêye.”
‘Divê hevalên 30 salî girtî mane seferber bibin’
Ozturk da zanîn ku divê peyama Ocalan were fêm, gav li gor wê were avêtin û wiha berdewam kir; “Niha pêvajoyek destpêkiriye, divê her hevalê 30 salî ji bo vê pêvajoyê pêşengtiyê bike, peyama Ocalan çiye? Gere were fêmkirin û ev heval vê yeke bêxin meriyetê. Weke seferberiyê bixebite û ji bo xwe tiştekî nefikire. Têkeve nava civakê, bi civakê re be û ji bo vê pêvajoyê bibe bersiv. Zîndan qada Serokatiyê ye. Piştî dîl girtina Ocalan yên ku herî zêde peyamên Ocalan fêm bikin hevalên zîndanan in. Ji ber ku hûrbûyîn û hîskirina wan zêdetir e. Girêdana hevalên zindanan a bi Ocalan ve cudatir e.”
‘Şerê çekdarî dê bi azadiyê were tacîdarkirin’
Ozturk bi bîr xist ku PKKê xwe fem kiriye, bi vê ve girêdayî barê giran ketiye ser mile qada siyasî û wiha pêde çû; “Di vê pêvajoyê de rola pêşengtiyê dikeve ser milê hevalên 30 sal. Piştî fesixkirina PKKê derfetên xebatên qada siyasî, qada civakî zêdetir bûn. Di pêşiya me de avakirina neteweya demokratîk heye. Pêdivî bi vê heye. Bi dawîkirina şerê çekdarî re kar zêdetir bûye, mîrasî heyî divê bi awayekî tacîdar bibe, vi azadiyê tacîdar bibe. Berê şerê çekdarî hebû, xebat pêtir diket ser wî alî niha ew tune û divê em tekoşînê bidomînin. Emê çawa tekoşînê berdewam bikin? Bi hişmendiyekî, li gor rihê pêvajoyê, helwesteke domdar. Pêşengtiya vê pêvajoyê avakirina netewên demokratîk e.”
‘Niha têkoşîn mezin bûye û di hûrbûnê de qelsî heye’
Ozturk cudahiya xebatên 30 sal berê û îro jî nirxandin û ev tişt li gotinên xwe zede kirin: “Beriya 30 salan û niha di aliyê rêxistinkirinê de cudahî hene. Berê ERNK hebû û wêde wesfînî ango zanebûn, li gor deme hûrbûn zêdetir bû. Wê demê dîsîplînek zede hebû. Niha mezin bûye lê di aliyê hûrbûnê de qelsî hene. Berê ji bo hevdîtinekî saetek hatiba gotin û 5 deqe derbas bûban, tu kes li benda tu kesê nedisekînî, ji ber ku cîdiyetek hebû. Niha biryara xebatekî an jî civînekê tê dayîn lê ev yek bi saetan jî paşde tê hiştin. Niha teknolojî pêş ketiye, dema mirov vê yeke ji bo xebatê bikar bîne tiştek baş e. Lê em wiha nakin û teknolojî gelek caran ji bo kar û xebatên me dibe asteng, ji ber ku me dide dest.”
‘Bi têkoşînê dewlet dê gavan biavêje’
Ozturk herî dawî da zanîn ku peymanên Ocalan baş hatiban famkirin da pêvajoyê bi awayekî cudatir bimeşe û axaftina xwe wiha bi dawî kir: “Me peyamên Ocalan baş fam kiriba, me yê wisa kiriba ku dewlet gav biavêje. Mînak hevalên nexweş gere heya niha hatibûyan berdan. Me peyam wiha fam kir, me got vaye Ocalan peyam da û dewlet ê gav biavêje, bi vî awayî me xwe sist kir û dewletê ev sistbûna me dît, her wiha ji ber vê yekê gav neavêt. Dewlet tiştekî nade me, dewlet li ser talanê, eger em tekoşîna xwe xurt bikin bi vê ve girêdayî dewlet ê gav biavêje. Îro yekî weke Bahçelî ger bêje werin em aştiyê bikin, ev li hev bikin, xetereya ji bo dewletê dît ji ber ev gotin anîn ziman. Ger em tekoşînê bilind nekin, dê nîqaşa pêvajoyê hebe û hew, nîqaşên dirêj bibin bi xwe re şêlûbûnê tîne. Dewlet gavan naavêje, em ê bi têkoşîna xwe gavan bidin avêtinê.”
