Amed – Platforma Saziyên Demokratîk duh li Amedê bi daxuyaniyekê deklerasyona “Çareseriya Demokratik û Meşa Azadiyê” bi raya giştî re parve kir. Yek ji nûnerê platformê Hunermend Kadîr Çat têkildarî meşê nirxandin kir û got: “Hewceye em weke siyasetmedar, hunermend, rewşenbîr di meşê de cih bigirin û vê krîzê veguherînin aştiyeke birûmet.”
Platforma Saziyên Demokratîk duh li Amedê, deklerasyona “Çareseriya Demokratik û Meşa Azadiyê” bi daxuyaniyekê bi raya giştî re parve kir. Di daxuyaniyê de diyar kirin ku meş dê îro (16ê Kanûnê) dest pê bike. Meş dê ji Amedê heya Enqerê bidome û dê di 20ê Kanûnê de li Enqereyê daxuyaniyekê bidin.
‘Divê hunermend, siyasetmedar û rewşenbîr di meşê de cih bigirin’
Yek ji nûnerê Platforma Saziyên Demokratîk Hunermend Kadîr Çat meşa ku dane dest pê kirin nirxand. Kadîr Çat bal kişand ser geşedanên di rojevê de û wiha got: “Şerê 3yemîn ê cîhanê bandorê li vî welatî jî dike. Hewceye em weke hunermend, siyasetmedar, rewşenbîr di meşê de cih bigirin û pêşengiyê ji meşê re bikin. Divê em bangawaziyê li çar aliyê welat û Tirkiyeyê bikin. Ji bo ku pirsgirêka kurd bûye pirsgirêka mirovahiyê.”
‘Divê gav bên avêtin û aştiyeke birûmet were çêkirin’
Kadîr Çat got ku “Ji bo aştiyeke birûmet hewcehî heye ku li Tirkiyeyê bangawaziyekê bikin” û wiha berdewam kir: “Krîza herî mezin a siyasî û aborî, krîzên bandorê li jiyana mirovan dikin hêdî hêdî mezin dibin. Divê hunermend, rewşenbîr, partî hewceye vê gavê biavêjin vê krîzê veguherînin aştiyeke birûmet. Tev li meşê bibin û bangawaziyeke mezin bikin ku vê pirsgirêka gelê Kurd çareser bikin, gav bên avêtin û aştiyeke birûmet çêbikin.
‘Meşeke dîrokî ye’
Kadîr Çat destnîşan kir ku şerê heyî ji aliye aborî, leşkerî, siyasî ve jiyanê dixetimîne û got: “Ji bo vê yekê ev meş girîng e û meşeke dîrokî ye.”
‘Li diji şer aştiyê bi pêş bixin’
Kadîr Çat herî dawî wiha got: “Ev şerê cîhanê yê sêyemîn hemû kesan eleqedar dike. Ne tenê Kurd, Ereb, Çerkez, Ermenî, Elewî û Sûnî herkesên li Tirkiyeyê dijîn. Lê Kurd pêşengtiya aştiyê dikin. Kurd dibêjin em hene em dixwazin dostên me jî welatparêz jî hemû werin di vê meşê de cih bigirin. Aştiyeke birûmet aştiyeke mezin çêbikin û li hemberî şerê cîhanê yê sêyemîn aştiyê bi pêş bixin û wekhevî û azadiyê bi hev re bînin.”
