Berdevkê Saziya Dadwerî ya Îranê Esxer Cehangîr diyarkir ku di encama êrîşa Îsraîlê ya li ser girtîgeha Evînê de, girtî jî di nav de 71 kesan jiyana xwe ji dest dane.
Balafirên şer ên Îsralê di şeva 24yê hezîranê de girtîgeha Evînê ya li Tahranê jî bombebaran kiribû.Berdevkê Saziya Dadweriyê ya Îranê Esxer Cehangîr li ser girtîgeha Evînê daxuyaniyek da.
Esxer Cehangîr got ku di encama êrişa Îsraîlê ya li ser girtîgeha Evîn ya li Tahranê de, 71 kesan jiyana xwe jidest dane û got; “Kesên jiyana xwe ji dest dane karmendên girtîgehê, ciwanên ku xizmeta leşkerî dikirin, hinek ji girtiyên di girtîgehê de, xizmên girtiyên ji bo serdanê hatibûn girtîgehê û hinek jî cîranên girtîgehê ne.”
Cehangîr got ku ji ber êrîşê ziyaneke mezin gihiştiye avahiya girtîgehê, cihê hevdîtina malbat û girtiyan û avahiya dozgeriya giştî ya li girtîgehê.
Hêjayî gotinêye girtîgeha Evînê dikeve taxa Evînê ya li herêma Şehran ya li paytexta Îranê, Tahranê. Di vê girtîgehê de Werîşe Mûradî û Pexşan Ezîzî jî di nav de gelek girtiyên din ên siyasî tên ragirtin.
