Şirnex – Orhan Dogan, jiyanek kurt û berxwedêr jiya. Jiyanek kurdewarî, jiyanek ji bo pêkanîna aştiyê û mafên mirovan.
Orhan Dogan mirov dikare bi gelek navan pênase bike. Kesayetek kurdperwer, siyasetmedar, dadzan, parêzvanê mafê mirovan û ya herî girîng rêwiyê aştiyê bû. Emrê wî têrê nekir lê şagirtên wî li ser rêya wî dimeşin û aştiyê pêk tînin.
Ew 25ê Tîrmeha 1955an li gundê Xelîla yê Kerborana Mêrdînê ji dayik bû, di malbateke karmend de mezin bû. Ji ber karê bavê xwe, xwendina xwe li gelek bajarên cuda temam kir û di sala 1974an de dest bi xwendina Fakulteya Hiqûqê ya Zanîngeha Enqereyê kir. Piştî qedandina xwendinê, bû parêzer û bi taybetî parêzvaniya çalakvanên Kurd ên di rewşên dijwar de.
Ji bo aştiyê berê xwe da Enqere
Orhan Dogan ji bilî parêzvaniyê di sala 1989an de dest bi xebatên vekirina şaxa ÎHDê ya Cizîrê kir û sala 1991an bû serokê Şaxa ÎHDê ya Şirnexê. Piştî xebatên Komeleya Mafên Mirovan dest bi xebatên siyasete kir û di damezirîna Partiya Kedê ya Gel (HEP) de cih girt. Di sala 1991an de ji HEPê bû parlementerê Şirnexê û ji bo mafên gelê kurd û aştiyê berê xwe da Meclîsa Enqereyê.
Di zindanê de jî dev ji têkoşîna xwe berneda
Her çiqas Orhan Dogan û hevalên xwe yên weke Ehmed Turk, Leyla Zana, Hatîp Dîcle û Selîm Sadak ji bo aştiyê berê xwe dabin Enqere jî dewletê rêya aştiyê li pêşiya wan girt û di sala 1994an de bi zorî ji meclîsê derxistin û ew xistin zîndanê. Li gel ku ku di zindanê de bû jî dev ji têkoşîna xwe berneda. Di zindanê de gelek gotar derbarê pirsgirêka Kurd û derbariyê aştiyek rûmet de nivîsîn û ev nivîs li gelek kovar û rojnameyan hatin weşandin, her wiha ji aliyê malbata wî ev gotarên wî di pirtûkekê de hatin komkirin û weke jiyana wî bi navê Nîv Jiyan hate weşandin.
Her tim digot; ‘Çareserî di rêyên demokratîk de ye’
Piştî ku 2004an Orhan Dogan serbest hat berdan di Partiya Civaka Demokratîk (DTP) de xebatên xwe domandin. Wî her tim li ser aştî û çareseriya demokratîk a pirsgirêka Kurd rawestiya, bi rêyên dîplomatîk û diyalogê li rêyên çareseriyê digeriya. Dogan bi xebatên xwe yên ji bo aştiyê navdar bû. Wî bawer dikir ku pirsgirêka Kurd tenê bi diyalog û rêyên demokratîk dikare were çareserkirin. Di axaftinên xwe de, wî her tim bang li dewlet û civakê dikir ku li şûna şîdetê, li ser maseya danûstandinê li hev bicivin.
Rêwiyê Aştiyê di 29ê Hezîrana 2007an de, dema ku li Bazîdê ji bo aştiyê axaftin dikir, ji ber qeyrana dil jiyana xwe ji dest da. Mirina wî bû sedema xemgîniyeke mezin di nav gelê Kurd û alîgirên aştiyê de.
Îro jî şagirtên Orhan Dogan li her qadê mîrateya wî ango li aştiyê xwedî derdikevin.
Orhan Dogan dê îro li ser gora xwe saet 18.00an de ji aliyê şagirtên xwe ve were bibîranîn.
