Platforma Piştevanî û Parastinê ya Amedê ku têkildarî pêvajoyê daxuyanî da destnîşan kir ku ji bo Rêberê PKKê Abdullah Ocalan bi awayekî bi bandortir tev li vê pêvajoyê bibe divê şertên wî bên baştirkirin û xwest ji bo çareseriyeke mayînde li Meclisê demildest komîsyonek were avakirin.
Platforma Piştevanî û Parastinê ya Amedê ji bo pêvajo bi leztir bi rê ve biçe li avahiya Şaxa Odeya Endezyarên Avahiyê ya Amedê daxuyanî da. Pêkhateyên platformê beşdarî daxuyaniyê bûn.
Yildiz Ok Orak li ser navê platformê axivî. Yildiz Ok Orak diyar kir ku ji bo çek ji holê rabin, qenalên diyalogê bên vekirin, pêşî li demokratîkbûna Tirkiyeyê bê vekirin û aştiyeke civakî pêk were pêvajoya heyî gaveke girîng e û wiha got: “Aştiya civakî ne tenê bêdengkirina çekan e, di heman demê de pêkanîna edaletê, nasîna mafên neteweyî, çandî û jiyaneke li ser bingeha hemwelatîbûna wekhev pêkan e. Ji ber vê yeke em hemû beşên civakê vedixwînin ku jinûve li ser aştiyê biaxivin, bi rêyên demokratîk û pirrengî çareseriyên mayînde hilberînin.”
Bang li herkesê kirin ku jidil tevkariyê li pêvajoyê bikin
Yildiz Ok Orak da zanîn ku hawîrdora şer û pevçûnê gefê ne tene li aştiya civakî di heman deme de li aramiya herêmî jî dixwe û wiha domand: “Bi taybetî geşedanên li Sûriye û Îranê nîşan didin ku divê meseleya kurd êdî neyê taloqkirin. Ji ber vê yeke em banga xwe ya çareserî, aştî û diyalogê nû dikin. Di serî de hikumet em bang li hemû partiyên siyasî, saziyên sivîl ên civakî û hemû beşên civakê dikin ku ji bo pêvajo biser bikeve bi cidîyet û jidil tevkariyê bikin.”
Daxwazên xwe rêz kirin
Yildiz Ok Orak daxwazên xwe yên ji bo pêvajoya heyî wiharêz kirin:
“*Em dibînin ku pêvajoya nû ya ku hatiye destpêkirin bi awayekî erênî lê hêdî hêdî pêş dikeve. Pêdivî pê heye ku ev pêvajo bi gavên zelaltir û biryardartir were pêşvebirin.
* Tevî daxuyaniya PKKê ya fesixkirinê operasyonên leşkerî berdewam dikin. Divê ev operasyon bên rawestandin. Ji bo bingeha aştiyê were xurtkirin ev yek gelek girîng e.
* Ji bo ku Rêberê PKKê Abdullah Ocalan bi awayekî bibandortir tev li vê pêvajoyê bibe divê şert û mercên wî bên baştirkirin.
* Divê Qanûna Têkoşîna Bi Terorê re bê betalkirin. Ev yek dê pêvajoya heyî bileztir bike.
* Ne tenê encamên şer û pevçûnan, lê divê sedemên wan jî bi rêbazên demokratîk û hiqûqî ji holê bên rakirin.
* Ji bo misogerkirina rewatiya civakî ya pêvajoya heyî û misogerkirina tevlibûna demokratîk, pir girîng e ku bi lezgînî Komîsyona Meclisê ya têkildarî meseleya kurd bikare bibe xwediyê çareseriyeke mayînde bê avakirin.”
Yildiz Ok Orak herî dawî diyar kir ku aştî pêdiviya vî welatî ye û avakirina vê peywîra herkesî ye.
