Seba vîrardişê qadroyanê PKK’yî yê pêşengan Alî Haydar Kaytan û Riza Altunî Wan de programê vîrardişî virazîya. Program de Mehmet Şîrîn Tunç qisey kerd û vat ke înan emrê xo de qet çok nêronayo.
Seba vîrardişê qadroyanê PKK’yî yê pêşengan Alî Haydar Kaytan û Riza Altunî Wan de programê vîrardişî virazîya û bi hezaran kesî beşdarê programî bîyê. Programê vîrardişî baxçeyê awanîya DEM Partî ya Wanî de ame viraştiş. Fotografê Altûn û Kaytanî baxçe de ameyî eliqnayene. Wendişê Çerxa Şorişî ra pey girse siloganê “Şehîd namirin” vat. Program de ewil Endamê Koma Çareserîya Demokratîk û Aştî Mehmet Şîrîn Tunç qisey kerd.
Ocalan rayîrêk akerd
Destpêkê qiseykerdişê xo de Mehmet Şîrîn Tunç, Kaytan û Altunî xo vîrî ardî û wina qisey kerd: “Înan seba herra pîroze canê xo da. Nê erdî de vatişê kurd qedexe bi la Birêz Ocalan bi sloganî ‘Kurdîstan mêtinger o’ vejîya rayîr. Nê her di embazê ma her tim Birêz Ocalan reyde hereket kerd û seba şarê xo têkoşîn da. Înan her tim vat, ma deyndarê şarê kurdî yê. Înan emrê xo de qet çok nêrona.”
Aştîya tewr girde, aştîya mabenê kurdan de ya
Tunç qiseyê xo wina qedînayî: “Ganî ma nê prosesî de yewîya xo awan bikerî. Ma ganî seba layiqbîyayîşê şehîdanê xo bixebitîyê. Rayberê Şarê Kurdî Abdullah Ocalan 26 serrî yo ke binê tecrîdî de seba şarê xo têkoşîn dano. Ma ganî lazimtîyanê vengdayîşê Aştî û Komelê Demokratîkî bîyarê ca. Aştîya tewr girde, aştîya mabenê kurdan de ya.”
Qiseykerdişan ra pey şîîrê Kaytanî bi vengê ey ameyê goştaritiş û mesajê Rayberê Şarê Kurdî Abdullah Ocalanî zî ame wendiş.
