Xizmên windayan li Amed, Êlih, Colemêrg û Îzmirê eqûbeta xizmên xwe pirsîn û xwestin kujer bêne darizandin.
Komeleya Mafên Mirovan (ÎHD) û xizmên windayan bi dirûşma “Bila winda bên dîtin, kiryar bên darizandin” li Amed, Êlih, Gever û Îzmîrê vê hefteyê jî derketin qadan û çalakiya dewam kirin.
Amed
Şaxa ÎHDê ya Amedê û Xizmên Windakiriyan di hefteya 826an a çalakiya “Bila winda bên dîtin û kiryarên wan bên darizandin” de li pêşiya Bîrdariya Mafê Jiyanê ya Parka Koşuyoluyê ya navçeya Rezanê hatin gel hev. Gelek Xizmên Windakiriyan û parastvanên mafan jî tev li çalakiyê bûn. Di çalakiyê de pankarta ku wêneyên kesên di bin çavan de hatine windakirin û bi cînayetên kiryarnediyar hatin qetilkirin li ser bû, hate hilgirtin. Di çalakiya vê hefteyê de serpêhatiya Ender Togcu hate xwendin ku di 29ê Mijdara 1994an de li navçeya Tetwanê ya Bedlîsê hatibû revandin û êdî agahî jê nehate girtin.
Serokê Şaxa ÎHDa Amedê Ercan Yilmaz beriya daxuyaniyê anî ziman ku ew ji bo dewlet bi sûcên xwe re hevrû bibe çalakiyê li dar dixin. Piştre jî Endamê Komîsyona Windakiriyan a ÎHDê Firat Akdenîz çîroka Ender Togcu xwendin. Firat Akdenîz, da zanîn ku Ender Togcu zewicî û bavê zarokekê bû, di 29ê Mijdara 1994an de dema diçû serdana hevjîna xwe hate windakirin. Di heman rojê de 7-8 polîs diçin mala bavê Togcu, Huseyîn Togcu, li wî û kurê wî yê biçûk dixin û dibêjin; ‘Kurê te di destê me de ye, em ê di nava sê rojan de cenazeyê wî bo te bişînin.” Akdenîz, da zanîn ku heman gef li kekê Togcu, Alî Togcu jî tê xwarin.
Firat Akdenîz, da zanîn ku piştî windakirina Ender Togcu, malbatê gelek caran serlêdan kirin lê encamek jê negirt.
Daxuyanî, bi çalakiya rûniştinê bi dawî bû.
Êlih
Şaxa ÎHDa Êlihê û Xizmên Windakiriyan di hefteya 662yan de li pêşiya Bîrdariya Mafên Mirovan a li ser Cadeya Gulistanê hatin gel hev. Di çalakiyê de pankarta “Bila winda bên dîtin û kiryar bên darizandin” û wêneyên windayan hatin hilgirtin. Xizmên Windayan, endamên Şaxa OHDê, rêveberên Şaxa MEBYA-DERê jî tevli daxuyaniyê bûn. Di çalakiya vê hefteyê de aqûbeta Nazim Gulmez hate pirsîn ku di 15ê Cotmeha 1994an de li gundê Taştêk ê Xozat a Dêrsimê ji hêla leşkeran ve hate binçavkirin û êdî agahî jê nehatin girtin.
Rêveberê Şaxa ÎHDa Êlihê Rezan Baytar çîroka Nazim Gulmez xwend. Rezan Baytar diyar kir ku Naizm Gulmez bavê 9 zarokan bû, li gundê Taştêkê dijî, debara xwe bi çandinî û sewalkariyê dikir, di 15ê Cotmeha 1994an de ji hêla leşkeran ve hate binçavkirin û ji wê rojê ve tu agahî jê nehatin girtin. Rezan Baytar, bi domdarî got: “Hevjîna Nazim Gulmez, Garîp Gulmez serî li serdarê Xozatê da lê jê re gotin; ‘Me demekî kin piştre berda, em jî lê digerin.’ Îcar Garîp Gulmez serî li Dozgeriya Xozatê da. Dozgeriyê, biryara bêrayetiyê da. Li ser vê yekê malbatê serî li Dozgeriya Leşkerî ya Xarpêtê da. Demek piştre jî dozgeriyê got ku wan dosya ji Dozgeriya DGMa Meletiyê re şandine. Dozgeriya Meletiyê jî got rayeya wê ya darizandinê ya wê nîne û ji Dozgeriya Komarê ya Xozatê re şand. Malbatê, bi alîkariya parêzeran di 26ê Adara 2016an de serî li DMMEyê da. DMMEyê jî bi hinceta ku li gorî pêvajoya 6 mehan tevnegeriyane, qebûl nekir.”
Daxuyanî, bi çalakiya rûniştinê bi dawî bû.
Colemêrg
Şaxa ÎHDa Colemêrgê û Xizmên Windayan jî di hefteya 152yan de li Kolana Hunerê ya Gevera Colemêrgê hatin gel hev. Di çalakiyê de pankarta “Bila winda bên dîtin û kiryar bên darizandin” û wêneyên windayan hatin hilgirtin. Di çalakiya vê hefteyê de girse ji bo Hasan Ateş hate gel hev ku di sala 1994an de ji ber cerdevanî qebûl nekir hatibû qetilkirin. Nûnerên partiyên siyasî û rêxistinên civaka sivîl jî tev li çalakiyê bûn. Daxuyanî ji hêla rêveberê Şaxa ÎDHê Eren Baskin ve hate xwendin.
Eren Baskin, da zanîn ku Hasan Ateş di sala 1994an di serdegirtinê gundê wî Mafûfanê de hate binçavkirin, di dema binçavkirinê de hate îşkencekirin, piştî berdanê zexta sîxûrtiyê û koçberiyê lê hate kirin. Baskin, anî ziman ku di Gulana 94’an de leşkeran bi ser gund de girtin, Ateş bi îşkenceyê li wesayîtê siwar kirin û binçav kirin. Eren Baskin, got ku endamên malbatê serî li qereqola cendirmeyan dan lê bersiva “operasyoneke wiha nehatiye kirin” hate dayin û gundiyan demek piştre li herêma Qereqola Serê Sêvê cenazeyên Hasan Ateş û Bedel Ozkan dîtine ku hatibûn îşkencekirin. Eren Baskin, got ku malbatê têkildarî mijarê serî li Serdozgeriya Komarê da û li gel ku Hasan Ateş li pêş çavên gundiyan hate binçavkirin jî ev yek hatiye înkarkirin. Baskin, anî ziman ku di dosyeya Ateş de ji ber polîtîkayên necezakirinê biryara “hewcehî bi şopandinê nîne” hatiye dayin û wiha got: “Heta ku em rastiya madî ya di qetilkirina Ateş de derdixînin holê dê têkoşîna me bidome. Em soz didin Ateş ku heta faîlên wî tên darizandin dê têkoşîna me bidome.”
Daxuyanî, piştî çalakiya rûniştinê bi dawî bû.
Îzmîr
Şaxa ÎHDa Îzmîrê jî çalakiya xwe li pêşiya Sumerbank a kevin a li navçeya Konakê li dar xist. Gelek kes tevli çalakiyê bûn û pankartên “Winda wijdan in, xwedî li wan derkevin” û “Kiryar diyar in, winda li ku ne” hatin hilgirtin. Di çalakiya vê hefteyê de aqûbeta Huseyîn Taşkaya hate pirsîn ku di 6ê Kanûna 1993yan de hatibû binçavkirin û ji wê rojê ve tu agahî jê nehatine girtin.
Hevserokê Şaxa ÎHDa Îzmîrê Alî Aydin serpêhatiya Huseyîn Taşkaya xwend. Alî Aydin, da zanîn ku hemû hewldanên ji bo dîtina Huseyîn Taşkaya bêencam mane û xwest ku tavilê aqûbeta hemû windayan bê eşkerekirin.
Piştî daxuyaniyê çalakî bi dawî bû.
