Nirxandinên Abdullah Ocalan ên têkildarî Newrozê, di pîrozbahiya Newrozê ya Stenbolê de ji hêla sed hezaran kesan ve hate guhdarîkirin. Sed hezaran piştî dengê Abdullah Ocalan bihîst bi yek dengî gotin “Bijî Serok Apo.”
Kongreya Demokratîk a Gelan (HDK) li Stenbolê bi dirûşma ‘Civaka Demokratîk a Azadiyê’ û bi tevlêbûna sed hezaran cejna Newrozê pîroz dike. Ji bo pîrozbahiya li qada Yenîkapiyê bi sed hezaran kes li hev kom bûn. Di pîrozbahiyê de tim û tim dirûşma ‘Bijî Serok Apo’ hate qîrîn û posterên Rêberê Gelê Kurd hatin hildan. Nirxandinên Rêberê Gelê Kurd Abdullah Ocalan ên têkildarî Newrozê, di pîrozbahiya Newrozê ya li Qada Yenîkapi ya Stenbolê ji hêla bi sed hezaran kesan ve hate guhdarîkirin. Dema li deng dihat guhdarîkirin, wêneyên Abdullah Ocalan li ser ekranên ledê yên li ser platformê hatin nîşandan. Di vê navberê de dirûşma “Bijî Serok Apo” li qadê olan da. Her wiha posterên mezin ên Ocalan hatin hilgirtin.
Alî Kenanoglu: HDK milyon in
Hevberdevkê HDK’ê Alî Kenanoglû di pîrozbahiyê de axivî û got: “HDK gel e, HDK milyon in û hûn nikarin HDK’ê hefs bikin. Niha li Stenbolê li dijî îradeya gel operasyonek heye. Em her tim li dijî derbeyan derketin. Em vê opearsyonê, derbeyeke li dijî Stenbol û Lihevkirina Bajar dibînin. Di heman demê de ev derbe provokasyoneke li dijî bana aştiyê ya birêz Ocalan e.”
Bi domdarî Kenanoglû bertek nîşanî Mansur Yavaş da û got: “Duh li Saraçhaneyê provokatorek hebû. Dema zarokên Kurd di bin panzeran de dihatin eciqandin ma te gotinek kir? Dabeşkarî karê van e. Em li dijî vê derbeyê ne. Me jî li Saraçhaneyê cihê xwe girt. Em ê firsendê nedin te. Mîna li dijî provokatorên vî welatî, em ê firsendê nedin te jî Ev Newroz Newroza xwedîderketina li aştî û civaka demokratîk e.”
Gultan Kişanak: Em li dijî şer aştiyê diparêzin
Aktîvîsta Tevgera Jinên Azad (TJA) Gultan Kişanak di pîrozbahiyê de got: “Hûn îro li vir dîrokekê dinivîsin. Gelê Kurd her çar aliyan li ser pêya ye û daxwaza azadiyê dike. Me her cureyên xerabiyê dîtin lê me tu caran dev ji Kurdbûna xwe û têkoşînê berneda. Deriyên girtîgehan vekin û ji bo birêz Ocalan vê pêvajoyê birêve bibe şert û mercan ava bikin. Birêz Ocalan banga Aştî û Civaka Demokratîk kir. Dê ciwan rêya siyaseta demokratîk vekin. Em daxwaza aştiyeke birûmet dikin. Em dixwazin bibin hemwelatiyên wekhev. Dixwazin zextên li ser ziman, çand û nasnameya me bi dawî bibin.”
Kişanak, wiha domand: “Em li dijî şer aştiyê diparêzin. Li dijî qeyûman bi îradeya gel re ne. Hinek kes dereng man lê hêvîdarim her kes rêgeza yên bi sindoqê hatin dê bi sindoqê biçin bibînin. Birêz Ocalan ji bo tifaqa Kurd û Tirkan bangekî gelek girîng kir. Niha dora gavavêtinê ya Enqereyê ye. Divê Enqere dengê gelan û dengê Rojava bibihîse. Pêşiya birêz Ocalan vekin û em bi hev re pêşerojeke azad û wekhev ava bikin.”
‘Em ê lîstikan pûç bikin’
Parlamentera DEM Partiyê Kezban Konukçu jî wiha got: “Tevî plana têkbirinê jî gelê me li ber xwe da û xwe gihand van rojan. Weke HDK’ê em ê van lîstikan tevekan vala derxînin. Em ji bo hemû gelan hemwelatiya wekhev dixwazin. Îro bi hincetên vala Ekrem Îmamoglû girtin. Em bi her kesên têdikoşin re ne. Weke jin û ciwanan em ê têbikoşin û teqez bi ser kevin.”
