Jinên ku di pêşengtiya TJAyê de hatin bahev bi meşaleyan li ser sûrên Amedê yên dîrokî Newroz pîroz kirin. Axîveran bal kişandin ser peyama Rêberê Gelê Kurd Abdullah Ocalan û gotin: “Îsal dê Newroz bibe Newroza aştî, azadî û aramiyê.”
Di pêşengtiya Tevgera Jinên Azad (TJA) de li ser bircên Ben û Senênyên navçeya Sûra Amedê yên dîrokî bi meşale û erbaneyan Newroz hate pîrozkirin. Parlamenterên DEM Partiyê, hevşaredarên Bajarê Mezin ên Amedê û yên navçeyên navendî, endam û rêveberên Rêxistinên Bajêr ên DBPê û DEM Partiyê, saziyên sivîl ên civakî û bi sedan kes tev li pîrozbahiya Newrozê bûn. Girseya li ber dahol û zirne û stranên hatin lêxistin govend gerand pişt re meşale vêxistin.
Dû re girse bi meşale û erbaneyan derket ser dikê û dirûşmên “Newroza te pîroz be ey Serok Apo”, “Newroz pîroz be” , “Bê Serok jiyan nabe” û “Bijî Serok Apo” berzkirin. Jinan jî dirûşma “Jin jiyan azadî” berz kirin û li gel erbaneyan stranên Newrozê gotin. Girseya ku pişt re ji sûran hate xwarê li ber stranan û dahol zirneyan govend gerand.
‘Newroz dê bibe Newroza aştî û azadiyê’
Dû re Hevseroka DEM Partiyê ya Amedê Gulşen Ozer a li vir axivî, Newroz li kesên tev li bernameyê bûn pîroz kir û wiha got: “Îsal dê Newroz bibe Newroza aştî, azadî û aramiyê.”
Pişt re aktivîst a TJAyê Hacer Ozdemîr Dayika Aştiyê Sakîne Arat bi bîr anî û wiha got: “Em di şexsê dayikê de bejna xwe li ber dayikên aştiyê ditewînin. Ji ber ku qet navber neda xebatên aştiyê. Ewqas kezeb şewitî bûn lê qet dest ji xebatên aştiyê bernedan.”
‘Divê em xwedî li peyamê derkevin’
Hacer Ozdemîrê bal kişand ser banga Rêberê Gelê Kurd Abdullah Ocalan û wiha got: “Di 27ê Sibatê de rêzdar Ocalan agirê Newrozê vêxist. Peyama rêzdar Ocalan pir girîng e. Dibêje bila qirkirina jinan, civakê û zarokan bisekine. Bila civakeke demokratîk pêş bikeve. Em peyama wî baş bigirin dest û baş xwedî lê derkevin. Kes nikare pêşiya vê peyamê bigire. Dê aştî were vî welatî. Divê em xebateke baş bimeşînin.”
‘Em ê bi xwedî derketina vê peyamê Newrozê bikin Newroza azadiyê’
Parlamentera DEM Partiyê Newroz Ûysal Aslan jî pişt re axivî û wiha got: “Meşaleya ku îro me li dile Kurdistanê vêxistî dê bigihije Akrê, Silêmaniyê û Hewlêrê û geş bibe. Ev meşaleya ku îro me li vê derê vêxistî dê bigihije Kobanê, Dêrîk, Mêrîwan, Sînê. Newroz ji bo gelê kurd pîroz e. Xeyala rêzdar Apo ew e ku li ser van Sûran Newrozê pîroz bike. Em ê bi xwedî derketina vê peyamê bikin Newrozê bikin Newroza azadiyê. Heta ku axa me azad bibe em ê bi rûhê Newrozê têbikoşin. Newroz li we tevan pîroz bibe.”
Bernameya Newrozê bi gerandina govendê bi dawî bû.
