Pisporê lêkolînên siyasî Dr. Midhet Hemad anî ziman ku banga Rêberê PKKê Abdullah Ocalan însiyatîfeke girîng e ku di encama lêhûrbûneke siyasî û ramyarî de li gorî guhertinên li herêmê û cîhanê pêk hatiye û got: “Ev bang dê bi stratejiyeke nû berjewendiyên Kurdan pêk bîne.”
Rêberê PKKê Abdullah Ocalan di 27ê sibatê de bi rêya şandeya DEM Partiyê peyamek dîrokî bi raya gişti ya cihanê re parve kir. Ev bang û peyama Rêberê PKKê Abdullah Ocalan dema bi raya giştî re hat parvekirin, bi sed hezaran welatî daketin qadan û li peyama Rêber Abdullah Ocalan guhdar kirin. Bang û peyama Abdullah Ocalan di çapemeniya cîhanê de cihekî taybet girt. Bertekên erênî yên hêz û kesayetên ji cîhanê yên der barê banga Rêber Abdullah Ocalan de dewam dikin.
Lêkolînerê xebatên Îranê û Asyayê yê li Zanîngeha Tanta ya Misirê û serokê Navenda El Farabî ya Lêkolînên Siyasî û Pêşketinê Dr. Midhet Hemad têkildarî mijarê ji Ajansa Nûçeyan a Hawarê (ANHA) re axivî û ziman ku daxuyaniya Abdullah Ocalan gelekî girîng e û got: “Lêvegereke nû ya siyasî, ramyarî, îdeolojîk û heta neteweyî diyar dike. Wî hemû rewşên cîhanî û herêmê bi lêhûrbûnê xwendine û nirxandine.”
Dr. Midhet Hemad bal kişand ser naveroka bangê û wiha berdewam kir: “Em ji banga Rêber Abdullah Ocalan fên dikin ku; di navbera Ocalan û dewleta Tirk de diyalogeke kûr û dirêj heye. Ev tê wê wateyê ku yekitiya Kurd û Tirkan di sedsala nû ya komarê de bûye mijarek pêwîst, ji bo parastina her du neteweyan. Bi dîtina min, eger Abdullah Ocalan sozên ji bo vekirina rêyên jiyana demokratîk û aştiyane lê pêşiya Kurdan ji Tirkan negirtibana ev daxuyanî nedida. Ev tiştekî girîng e ku di peyv û rêzikên nameya Ocalan de diyar dibin.”
Stratejiyeke nû
Midhet Hemad destnîşan kir ku ev mijar stratejiyeke nû ya Rêber Abdullah Ocalan derdixe holê û wiha axivî: “Abdullah Ocalan ji aliyekî ve tiştên paşperdeyê xwendine û dizane dê siberoja doza kurdî çawa be, ji aliyekî din ve belkî wî hin planên rojavayî bi taybetî yên Amerîkayê jî dîtine ku dibe ev plan di salên bê de li dijî berjwendiyên stratejîk ên Kurdan û Tirkan bin, wekî berdewama plana li Sûriyeyê. Ev jî mijareke pir tirsnak e.”
Midhet Hemad di dawiya axaftina xwe de got Rêber Abdullah Ocalan rewşên li herêmê û yên navneteweyî dinirixîne û wiha lê zêde kir: “Abdullah Ocalan dixwaze siberoja doza Kurd rizgar bike, berevajî hin rêxistinên din ên siyasî, wekî Îxwan El Muslimîn ku ew qas bêaqil bû bi piraniya sîstem û dewletên ku Îxwan lê hene, kete arîşeyê, wekî çawa li Misirê çêbû. Dema ku Îxwan El Muslimîn ket pêşberî Misirê û rewş baş nenirxand, projeya wan a li Misir û piraniya dewletên Ereban têk çû. Abdullah Ocalan li vir dîmen baş xwend û çarenûsa Îxwn El Muslimîn jî baş xwend û xwest hebûna doza Kurd heta sed salên din biparêze.”
