Enqere – Endama Heyeta DEM Partiyê ya Îmraliyê Pervîn Buldan ku tev li konferansa jinan a “Em bi hev re li ser pêşerojê diaxivin” bû, bi lêv kir ku di pêvajoya Aştî û Civaka Demokratîk de pêdiviyeke mezin bi rol û mîsyona jinan heye û wiha got: “Divê jin li her derê di nava piştgiriyê de bin û mil bi mil pêvajoyê bi aştiyê misoger bikin.”
Li ser banga 80ê jinên di nav wan de rojnameger, nivîskar, akademîsyen, aktivîst û siyasetmedar hene li Enqereyê Konferansa “Em bi hev re li ser pêşerojê diaxivin” tê lidarxistin. Di roja yekem a konferansê de jinan, li ser pirsgirêkên weke tundiya li dijî jinan, qetilkirina jinan, kedxwarî ku ji ber pergala kapîtalîzmê û desthilatiya zilam derketine holê niqaş kirin. Her wiha yek jî mijara konferansê Pêvajoya Aştî û Civaka Demokratîk bû. Jinan li ser pêvajoyê jî nirxandin, li ser jin dikarin di pêvajoyê de roleke çawa bilîzin niqaş niqaş kirin û di van niqaşan de pêdiviya têkoşîneke hevpar derket pêş.
Yek jî vexwînera konferansê Endama Heyeta Îmraliyê ya DEM Partiyê Pervîn Buldan têkildarî mabesta konferansê û xebatên piştî konferansê dê bên kirin ji Ajansa Welat (AW) re axivî.
‘Di pêvajoya aştiyê de pêdiviyeke mezin bi rol û mîsyona jinan heye’
Pervîn Buldan bi lêv kir ku tevlibûneke xurt ji konferansê re heye û wiha axivî: “Dema mijar dibe aştî beşdariya jinan hîn bi wate dibe. Ji ber ku aştî herî zêde jinan eleqedar dike. Di pêvajoyên pevçûnan de herî zêde jin bandor dibin. Ji bo wê jî di pêvajoya aştiyê de pêdiviyeke mezin bi rol û mîsyona jinan heye. Em ê di vê konferansê de li ser vê yekê biaxivin. Weke jin em dê çawa aştiyê mîsoger bikin. Ji ber ku dema em qala aştiyê dikin di heman demê de em qala kedê, kedxwariyê, krîza aborî û pirsgirêkên civakî dikin. Ji bo wê jî ew hemû me eleqedar dike. Jin ne tenê di vê konferansê de li her derê divê werin cem hev. Ji ber ku aştî li ser siyasetê ye. Divê em nasnameya xwe ya siyasî bidin aliyekî weke jin vê pêvajoyê binêrin û niqaşê li ser rol û mîsyona xwe bikin. Ji ber wê jî em ê li ser aştî û ji niha şûnde divê em çi bikin, niqaşan bikin.”
‘Divê em pirrenginiya vir belavî hemû Tirkiyeyê bikin’
Her wiha Pervîn Buldan destnîşan kir ku niqaşên di konferansê de derkevin dê ji bo xebatên demên pêş gelek tiştan dide pêş wan û bi van hevokan dawî li axaftina xwe anî: “A girîng li qadan, kolanan û li her derê qala aştiyê bikin û aştiyê civakî bikin. Ji bo wê jî rol û mîsyoneke mezin dikeve ser milê jinan. Berdelên me dane, êşên me kişandine ew hemû nîşanî me didin ku aştî çiqas bi wate û girîng e. Divê niha şûn ve jî jin tenê bi vê yekê sînorkirî nemînin. Jin li her derê di nava piştgiriyê de bin û mil bi mil pêvajoyê bi aştiyê misoger bikin. Berê jî tiştên bi vî rengî hatin kirin lê ne ewqas berfireh bû me xwe bi xwe dikir. Lê îro gelek beşên cuda yên civakê, baweriyên cuda û gelek kes tev li bû. Ji bo wê jî divê em vê pirrengiyê hê zêdetir bikin û belavî hemû Tirkiyeyê bikin û ji bo aştiyê behtir bixebitin.”
