Amed – DFGê, MKG û Dîsk-Basin-Îş û gelek rojnamegeran, di 8emîn salvegera koça dawî de Mamoste û Rojnameger Kadrî Kaya li ser gora wî bi bîr anîn.
Rojnameger û kedkarê Çapemeniya Azad Kadrî Kaya li ser gora xwe ya li Goristana Yenîkoyê ya li navçeya Rezan a Amedê bi girseyî hat bîranîn. Endam û rêveberên Komeleya Rojnamgeran a Dîcle Firatê (DFG), Komeleya Rojnamegerên Jin a Mezopotamyayê (MKG), Dîsk-Basin-Îş, gelek rojnameger û xizmên wî di bîranînê de amade bûn. Bîranîn ji bo hemû şehîdên Çapemeniya Azad deqeyeke rêzgirtinê dest pê kir.
Hevserokê DFGê Selman Çîçek piştî rêzgirtinê axivî, got ku ew ê tu carî mamaste Kadrî Kaya ji bîr nakin û ew ê her tim li ser şopa wî bimeşin.
Rojnemeger Mehmet Alî Ertaş jî diyar kir ku Mamoste Kadrî Kaya gelek ked daye xebatên Çapemeniya Azad û wiha axivî: “Mamoste Kadrî ji salên 1990î heya dawiya emrê xwe kedek mezin da. Him di aliyê pîşeyî de him di aliyê rojnamegeriyê de mamostetiya me kir. Rêyek ronî ji me re vekir û em jî dê her tim li ser wê riyê bimeşin. Di kesayeta Mamoste Kadrî de em hemû şehîdên Çapemeniya Azad careke din bi bîr tînin.”
Bîranîn bi danîna gulan a li ser gora mamosteyê Çepemeniya Azad Kadrî Kaya, bi dawî bû.
