MEBYA-DERa Êlihê bi boneya 40 rojiya şehîdên Tevgera Azadiya Kurd mewlûd da. Parlamentera DEM Partiyê ya Şirnexê Ayşegul Dogan got ku ew ê xewn û xeyalê şehîdan pêk bînin.
Bi pêşengtiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Windakirine (MEBYA-DER) ya Êlihê bi boneya 40 rojiya şehîdên Tevgera Azadiya Kurdistanê li Eywana Dawetê ya Vûralê ya li taxa Pazaryeriyê mewlûd hat dayîn. Di mewlûdê de rêveber û endamên MEBYA-DERê, Hevberdevka DEM Partiyê parlamentera Şirnexê Ayşegul Dogan, Rêxistinên Partiyên Siyasî yên navend û navçeyan, Dayikên Aştiyê, Aktîvîstên TJAyê, gelek saziyên sivîl ên civakî û gelek kes tev li bûn.
Li Eywana ku mewlûd lê hate dayîn posterên mezin ên Rêberê Gelê Kurd Abdullah Ocalan û pankartên “Malbat şopdarên şehîdên xwe ne”, “Şehîdên me rûmeta me ne” û “Şehîd namirin” hatin daliqandin. Girseyê ji bo cangoriyên Tevgera Azadiyê deqeyek rêzgirtin û piştî rêzgirtinê dirûşmeya “Şehîd namirin” berz kirin.
‘Em miletekî serbilind in’
Hevberdevka DEM Partiyê parlamentera Şirnexê Ayşegul Dogan di mewlûdê de axivî û ev tişt anî ziman: “Rewşeke zehmet û giran e, em qala şîneke herî kêm 50 salan dikin. Axaftina derbarê wan de ne hêsan e. Dilê me jî gelek diêşê û em dizanin dilê we jî diêşê. Em Kurd li her devera cîhanê dibêjin; me ev êş dîtiye û xwedê nede tu kesî, bila tu kes nebîne. Em weke miletê Kurd ne aşiqê şer û pevçûnê ne. Van kesên ku canê xwe feda kirine, ne ji bo berjewendiyên xwe yên takekesî kirine. Dest dirêjî tu tiştekî nekirine. Zimanê kesî, heqê kesî, hebûna kesî û tu kesî bi tenê nehesibandine. Ji bo tu kesî negotine; Kuştin, qirkirin, bombebarandin, surgunkirin û parçekirin qeder e. Em miletekî serbilind in. Em çi ji xwe re dixwazin, em ji gelên din re jî dixwazin. Lê gelên din ji xwe re çi dixwazin, em jî ji xwe re dixwazin, ji ber ku heqê me jî heye, em mafdar in. Em ê xewn û xeyalên şehîdan bi cih bînin. Wekî tê zanîn niha pêvajoyek heye, em bi têkoşîna xwe û mîmarê vê pêvajoyê bibawer in.”
Mewlûda şehîdan bi dirûşma “Şehîd namirin” bi dawî bû.
