40 hezar mirovên li Bajarê Eyn Îsa dijîn, ji ber êrişên artêşa tirk bêav mane . Welatî avê bi zor û zahmet peyda dikin.
Êrîşên Tirkiyeyê yên bi balafirên şer, tang û topan li dijî Bakur û Rojhiatê Sûriyeyê berdewam dikin. Tirkiye û komên paramîlîter, bi SÎHAyan her roj Bendava Tişrînê, Kobanê, Eyn Îsayê, Tebya, Reqa, Qamişlo û gelke bajarên din bombe dike. Tirkiye bi van êrîşan saziyên xizmetê û binesaziyê dike hedef. Di êrişan de stasyonên sereke yên ava vexwarinê û tora elektrîkê hatin bombebarankirin û ji xizmetê derketin. Di demên dawîn de depoya berhevkirina avê ya li Eyn Îsayê, stasyona avê ya El Hîşe û stasyona avê ya El Fatse jî bûn armanca êrişan û xebata wan sekinî.
Hevseroka Rêveberiya Avê ya Eyn Îsayê Sanaa El Elî têkildarî êrîşan û pirsgirêkên derketine holê ji Ajansa Nûçeyan a Hawarê (ANHA) re axivî û got: “Dagirkeriya Tirk di dema dawîn de giraniya êrişan da ser dezgehên xizmetguzariyê da ku jiyana şêniyan asteng bike. Rasterast depoya berhevkirina avê û torên elektrîkê yên ku stasyonên El Hîşa El Xamiyê kirin armanca êrişan, her wiha di êrişan de stasyona El Fatse bi temamî wêran kirin.”
Senaa El Elî da zanîn ku ji ber êrîşan ava vexwarinê li ser 65 gundan (45 dungên El Hîşa û 20 gundên Eyn Îsayê) ku 41 hezar kes lê dijîn, qut bûye û wiha got: “Berdewamkirina qutbûna avê dê şêniyên herêmê neçar bike ku ava bi kêrî vexwarinê nayê bi kar bînin ku dibe sedema nexweşiyan.”
Senaa El Elî der barê hewldanên wan ên ji bo peydakirina pêdiviyên şêniyan de jî axivî û wiha berdewam kir: “Tenê sîtêreke avê heye û 24 saetan dixetibe, lê ew têra hewcedariyên şêniyan nake.”
Hevseroka Rêveberiya Avê Senaa El Elî di dawiya axaftina xwe de anî ziman ku heta niha ji ber dewamkirina êrişên artêşa Tirk tîmên teknîk nikarin xwe bigihînin wan dezgehan û sererast bikin.
Rayedarên kantona Firatê diyar kiribû ku ji ber êrişên artêşa tirk û komên paralîmiter zerara gihiştiye dezgehên avê bi qasî milyonek dolarî ye û bi hezaran malbatan jî ji ber qutbûna avê ziyan dîtine.
