Komîsyona lêpirsînê ya serbixwe ya ji aliyê Neteweyên Yekbûyî ve hatî wezîfedarkirin, ragihand ku Îsraîl li Xezeyê qirkirinê didomîne, li Şerîaya Rojava jî sûcên li dijî mirovahiyê dike.
Komîsyona Lêpirsînê ya Navneteweyî ya Serbixwe ya ji aliyê Neteweyên Yekbûyî (NY) ve hatî wezîfedarkirin, roja duşemê raporek weşand û diyar kir ku agirbesta Cotmeha 2025an li Xezeyê hatî ragihandin, çalakiyên Îsraîlê yên li hemberî Fîlîstîniyan bi dawî nekiriye.
Komîsyonê Îsraîl sûcdar kir ku li hemberî Fîlîstîniyên li Şerîaya Rojava “îmhaya komî” û sûcên dermirovî pêk tîne û sûcdariyên qirkirinê yên li Xezeyê dubare kir.
Li gorî komîsyonê, hêzên Îsraîlê piştî agirbestê li Xezeyê kontrola xwe zêde kiriye. Ji Cotmeha 2025an ve herêma di bin kontrola Îsraîlê de ji sedî 53 herî kêm derket sedî 60ê, di vê demê de di encama gulebarana Îsraîlê de herî kêm 196 Fîlîstîniyan jiyana xwe ji dest dan.
Li Şerîaya Rojava işkence û tundiya zayendî
Di raporê de hate diyarkirin ku li Şerîaya Rojava ya dagirkirî kiryarên hêzên Îsraîlê û personelên ewlekariyê yên li hemberî Fîlîstîniyan di çarçoveya sûcên şer û sûcên li dijî mirovahiyê de hatine nirxandin. Komîsyonê tespîtên xwe yên têkildarî sûcên îmha, îşkence, destdirêjî, şêwazên din ên tundiya zayendî û zilmê ragihand.
Hat ragihandin ku komîsyonê 7 bûyerên navbera Mijdara 2023yan û Hezîrana 2026an lêkolîn kiriye û di van bûyeran de hêzên Îsraîlê zirara fîzîkî daye Fîlîstîniyên ku piranî jê zarok bûn.
Di raporê de hate diyarkirin ku Îsraîlê li girtîgeha leşkerî “Sde Teiman” li dijî gelek girtiyan tundiya zayendî pêk aniye.
Îsraîl jî sûcdariyên qirkirinê û êrîşa zayendî red dike; dema rapor hate weşandin têkildarî tespîtên nû bersiveke fermî nedabû.
Komîsyon diyar dike ku ev tespît dibe siberojê bibin bingehê lêpirsînên ku di Dadgeha Cezayê Navneteweyî yan jî sîstemên daraza neteweyî de bên meşandin.
