Komeke koçberên Girê Spî ku li ser vexwendina Rêveberiya Herêma Girê Spî xwestibûn vegerin warên xwe, dema gihîştin bajar rastî êrişê hatin. Di êrişê de wesayîtên welatiyan hatin talankirin.
Komek koçberên Girê Spî yên ku ji bo vegera malên xwe berê xwe dabûn bajar, bûn armanca êrişekê. Li gorî nûçeya ajansa ANHAyê kom bêyî ku bi Komîteya Koçberên Girê Spî re koordîneyekê çêbikin, bi armanca vegerê û li ser vexwendina fermî ya Rêveberiya Herêma Girê Spî çûbûn avahiya rêveberiyê.
Lê belê koma ku gihîşt herêmê, rastî êrişê hat. Di encama êrişê de, êrişkaran ziyan da wesayîtên welatiyan û ew talan kirin.
Komîteya Koçberên Girê Spî ragihand ku zêdetirî 100 malbatên Kurd li hundirê avahiya Gerînendetiya Herêmê hatine dorpêçkirin û daxwaza destwerdana lezgîn ji bo parastina wan û lêpirsîna êrişên li dijî welatiyên Kurd ên vegerîne malên xwe kir.
