Pinpinîka Sultanê ku bi navê “Şahbanûya Afrîkayê” jî tê naskirin îsal li seranserê Baxçeyên Hewselê û newala Çemê Dîcleyê li her derê derdikeve pêş.Wênekêş Mehmet Masum Suer li Baxçeyên Hewselê wêneyekî Pinpinîka Sultanê ku di bin tîrêjên rojê de baskên xwe bi temamî vekiri bû û xwe germ dikir kişand.
Pinpinîka Sultanê ku bi navê “Şahbanûya Afrîkayê” (African Queen) jî tê naskirin û berê tenê li hindek deverên taybet dihat dîtin, îsal li seranserê Baxçeyên Hewselê û newala Çemê Dîcleyê li her derê derdikeve pêş. Wênekêş Mehmet Masum Suer li Baxçeyên Hewselê wêneyekî Pinpinîka Sultanê ku piştî hewaya hênik û baranê, di bin tîrêjên rojê de baskên xwe bi temamî vekiri bû û xwe germ dikir, kişand.
Pinpinîk ji bo ku karibin bifirin û tevbigerin hewcehiya wan bi germahiya rojê heye. Ji bo ku laşê xwe germ bikin, baskên xwe bi temamî vedikin û demekê vekirî dihêlin. Pispor diyar dikin ku ji bo pinpinîk bikaribe bifire, nektarê kom bike û cotekî bibîne, divê germahiya beşa sînga wê bigihe nêzîkî 30 heta 40 pileyan. Pisporên pinpinîkan li ser vê rewşê van agahiyan didin: “Di serê sibê de yan jî di hewaya hênik de, ew ji bo komkirina germê baskên xwe bi berfirehî vedikin û hema hema mîna panelên rojê tevdigerin. Ev germahiya ku li ser baskan tê komkirin, bi rêya damarên rasterast derbasî laşê pinpinîkan dibe. Bi taybetî cureyên pinpinîkên koçber, ji bo ku rêya xwe bibînin pêdiviya wan bi tavê û aliyê hatinê yê tîrêjên tavê heye.”
Pinpinîka Sultanê ji ber ku hez ji hewaya germ û şil dike; ev yek jî Baxçeyên Hevselê dike jîngeheke îdeal ji bo vî cureyî. Pinpinîka Sultanê xizmê pinpinîka navdar a ku bi navên “Kral an şahbanû” tên naskirin ku li parzemînên Amerîkayê dijî. Ev pinpinîk bi wê yekê navdar in ku piştî havînê cihên xwe yên zayînê li bakurê rojhilatê Amerîka û Kanadayê diterikînin û di demsala payîzê de mesafeyeke nêzîkî 5 hezar kîlometreyî difirin heta Meksîkayê.
