Li Amedê di çarçoveya “Solo Turk” de nîşandana firîna balafirên şer F-16 ku hate kirin, ji ber dengê balafiran aramiya gel xira bû.
Li Amedê bi malovaniya Walîtiya Amedê bi organizasyona Wezareta Parastinê ya Tirk, Hêza Hewayî ya Tirk û Solo Turk nîşandana firîna balafirên şer F-16 hate kirin. Ev nîşandana balafirên şer li ser esmanên Sûrê û Baxçeyên Hewselê pêk hat. Demeke dirêj ev balafirên şer li esmanan geriyan û adeta hizûra gel xira kirin. Ji ber dengê dijwar ê balafiran bi taybetî ajalên bi bask tirsiyan û welatî jî ketin nava tirs û xofê.
Bi taybetî îro ji ber roja Şemiyê ye, bi hezaran mirov li kuçeyên Sûrê digerin û ev firîna balafirên şer bû sedema tirsê û hêrsa xelkê.
Jixwe salên dûr û dirêj bûn li Amedê ji balafirgeha leşkerî balafirên şer difiriyan û tevî pêvajoyê jî balafir difirin û dengê balafiran li ser derûnî anku aramiya xelkê bandorek neyînî dike.
