Li zeviyên Baxçeyên Hewselê û Zanîngeha Dîcleyê yên Amedê bi dehan donum kenevîr tê çandin. Ajansa me xwe gihand kordînatên zeviyên kenevîrê.
Li Amed û navçeyên wê di demên dawiyê de bikaranîna tiryakê zêde bûye û her ku diçe ciwanên Amedê dikevin nava xefka hişbirê. Li gorî çavkaniyên me yên ku ji ber ewlehiyê nexwestin navê xwe bidin, piraniya hişbirê ji aliyê hin çeteyan ve di nav zeviyên Baxçeyên Hewselê de tê çandin. Çavkaniyên me yên ku herêmê baş dizanin û zeviyên tiryakê bi çavên xwe dîtine kordînatên van zeviyan bi me re parve kirin.
Niha di parsela 592yan a Zenîngeha Dîcleyê de zeviyên kenevîrê hene
Li gor agahiyên me bidest xistine beriya 2 rojan kesên ku tiryak li nava parsela bi hejmara 592yan çandine dest bi çinîna wê kirine. Çavkaniyên ku agahî dane me diyar kirin ku ev parsel dikeve nava erdê Zanîngeha Dîcleyê û Rektorê Zanîngeha Dîcleyê li gel ku ji van zeviyan agahdar e jî li hember vê tiştekî nake.
Ji Pira Dehderî heya gundê Tilhamê tê çandin
Çavkaniyên me dan zanîn ku ji Pira Dehderî heya gundê Tilhamê çandiniya kenevîrê tê kirin û derbarê van deverên ku kenevîr lê tê çandin gelek caran gilî ji rayerdarên dewletê kirine lê encamek derneketiye holê.
Dema çinînê dikin çavdêran li derdora bicih dikin
Çavkaniyên me diyar kirin ku dema çinîna kenevîrê tê kirin, gelek çavdêr li deverên bilind ên Baxçeyên Hewselê tên bicihkirin. Li gor agahiyên me bi destxistine ev çavdêr li herêma Deriyê Mêrdînê û Deriyê Nû yên navçeya Sûrê û li Taxa Fîskayayê ya Bajarênû tên bicihkirin.
Piştî çinînê li heman derê binax dikin
Çavkaniyên ku agahî dane me derbarê derxistina kenevîrê ya ji cihê çandiniyê de jî wiha gotin: “Dema çinînê dikin, kenevîrê li vir hişk dikin û binerd dikin. Pişt re li gor firotinê par bi par ji vir tê derxistin. Ji xwe bi şev û roj çavdêrên wan li dora zeviyan û cihê kenevîr lê hatiye veşartin digerin.”
Kordînatên li jêr zeviyên kenevîrê nîşan didin û li derdora van kordînatan bi dehan donum zeviyên kenevîrê hene.
