Hunermend Bermal Çem bi boneya salvegera şehadeta Mazlûm Tekdag klîba bi navê “Xewna Çiya” amade kir. Mazlum Tekdag di 1ê Cotmeha 2019an de di êrişeke hewayî ya dewleta Tirk de li Herêmên Parastina Medyayê jiyana xwe ji dest dabû.
Mazlûm Jiyanda (Mazlûm Tekdag) di 1ê Cotmeha 2019an de di êrişeke hewayî ya artêşa dewleta Tirk de li Herêmên Parastinê yên Medyayê ya bi ser başûrê Kurdistanê ve şehîd bûbû. Hunermend Bermal Çem bi boneya salvegera şehadeta Mazlûm Tekdag klîbeke bi navê “Xewna Çiya” amade kir. Gotin û muzîka stranê aydê Bermal Çem e. Derhênerî û kişandina klîbê ji aliyê Kerem Pola ve hatiye kirin. Klîb wê îro li ser hesabên Bermal Çem ên medyaya dîjîtal bê parvekirin. Hunermend Bermal Çem derbarê amadekirina klîbê û jiyana şehîd Mazlûm Tekdag de ji Ajansa Welat (AW) re axivî.
Hin di temenekî biçûk de ew rastiya jiyanê nas dike
Hunermend Bermal Çem amadekarina klîbê û jiyana Mazlûm Tekdag wiha vegot: “Çawa ku her stranek behsa serdemekê dike, strana Xewna Çiya jî yek ji van stranan e. Çîroka wî lawikê Amedê ku jiyaneke 37 sal bi tekoşînê derbas dike vedibêje. Belê Mazlum Tekdag, zarê çiyayan ji Amedê heta çiyayayên Kurdistanê, şopên kenên xwe ji pêşerojê re dihêle. Hîn di temenekî biçûk de ew rastiya jiyanê nas dike û çavê xwe tekoşînê vedike. Ew di nava rêhevalê xwe de weke zarokê şoreşê tê penasekirin.”
Mazlûm bi serpêhatiyên berxwedêr mezin dibe
Bermal Çem di berdewamiya axaftina xwe de bal kişand ser serpêhatiya Mazlum Tekdag û malbata wî û ev yek anî ziman: “Ew neviyê jina berxwedêr Arîfe Tekdag û lawê Mehmet Tekdag e, yê ku ji aliyê kontrgerîla ve hate şehîdkirin. Dema bavê wî Mehmet tê qetilkirin ew hîn 8 salî ye. Zilm û zordarî zû li deriyê wan dide. Ew hîn di temenê xwe yê 8 salî de, di demên zor û dijwar de weke generalekî biçûk, kolan bi kolan rojnameya Ozgur Gundemê belav dike. Mazlûm bi serpêhatiyên berxwedêr mezin dibe. Ew dibe şervanê bavê xwe û her kêliya jiyana xwe bivê hestê jiyan dike. Di ciwantiya xwe de, di partiyên HEP, DEP, HADEP, DEHAP de karên siyasî dide meşandin. Gelek caran tê girtin û îşkencekirin. Ji bo şikandina tecrîda li ser Rêberê Gelê Kurd li zindanê dikeve rojiya mirinê. Ew helbestvan, ew şervan, bû dengê gelê xwe. Berê xwe da çiyayên welatê xwe û ji bo doza gelekê bost bi bost tovê jiyanê çand.”
‘Ew rêhevalê min, jiyan û henasa min bû’
Hunermend Bermal Çem axaftina xwe bi vê nirxandinê bi dawî kir: “Dayika Mazlûm, Aysel Tekdag dema behsa lawê xwe dike dibêje ‘ew rêhevalê min, jiyan û henasa min bû. Ew neçû, îro di dilê sed hezaran de dijî’. Belê generalê biçûk Mazlûm Tekdag di sala 2019an de di 1ê meha Cotmehê de, li qadên parastina medya şehîd dikeve. Kenê Mazlûm weke xewneke azadiyê li ser lêvên zarên welatê wî digere û ew xewn îro rastî ye. Xewna çiya îro Mazlûm e. Rojên azad û civakeke demokratîk e.”
