Komeleya Rojnamegeran a Dîcle û Firatê, rojnamer Seyîd Evran ê ku di 2023an jiyana xwe ji dest dabû bi bîr anî.
Komeleya Rojnamegeran a Dîcle û Firatê (DFG) li ser hesabê xwe yê medya dîjîtal ji bo bîranîna rojnameger Seyîd Evran ê ku di 22yê Îlona 2023yan de li rojavayê Kurdistanê jiyana xwe ji dest dabû bi bîr anî.
DFGê di parvekirina xwe de bal kişand ser xebatên Seyîd Evran ên rojnamgeriyê û wiha got: “Seyîd Evran jiyana xwe fedayî ragihandina têkoşîna azadî û demokrasiyê ya gelê Kurd, bûyerên li Kurdistanê û rastiya gelan a ji cîhanê kir. Seyîd Evran ê ku bi pênûs û kameraya xwe bûyerên li çar aliyên Kurdistanê qeyd kirin, rojnamegeriyê ne wekî tenê pîşeyekî, wekî amûreke berbiçavkirina rastiya gelan û şahidiya dîrokê dît.”
‘Wî ji bo nifşên nû mîrateyek hişt’
DFGê diyar kir ku Seyîd Evran tenê ne ji bo rojnamgeriyê her wiha ji bo nifşên paşerojê jî mîrateyek girîng hiştiye û wiha berdewam kir: “Seyîd Evran bi rojnamegeriya xwe ne tenê ji bo îro, lê belê ji bo nifşên pêşerojê jî mîraseke girîng a şahidî û belgeyan hişt. Wêneyên ku li qadên şer kişandin, nûçeyên ku nivîsandin û nirxandinên ku kirin, hafizeyeke girîng der barê dîroka nêzîk a gelê Kurd de ava kirin.”
‘Xwedîderketina mîrateya Seyîd Evran ji bo me berpirsyariye’
DFGê herî dawî da zanîn ku şopandina mîrateya Seyîd Evran ji bo wan berpirsyariyeke û peyama xwe wiha bi dawî kir: “Zindîhiştina bîranîna wî, xwedîderketina li mîrateya rojnamegeriyê ya ku wî li pey xwe hişt û berdewamkirina parastina rastiyê, ji bo me berpirsiyariyek e. Bîranîna Seyîd Evran dê di nava heqîqetên ku bi qelem û kamera xwe qeyd kirine û di têkoşîna gelê Kurd de bijî û bidome.”
