Welatiyên Amedê li ser pêvajoya Aştî û Civaka Demokratîk axivîn û gotin: “Em dixwazin êdî bila xwîn nerije. Bila dayikên kesî negirîn, bila demokrasî were vî welatî. Wê azadiya fizîkî ya Rêberê Gelê Kurd Abdullah Ocalan pêvajoyê li pêş bixe.”
Pêvajoya Aştî û Civaka Demokratîk a ku ji aliyê Rêberê Gelê Kurd Abdullah Ocalan ve di 27ê Sibata 2025an de hatibû destpêkirin, berdewam dike. Di 10ê Tebaxê de Qanûna Çarçoveyî bi 468 dengan di Desteya Giştî ya Meclisê de hat qebûlkirin. Di çerçoveya vê qanûnê de tê payîn ku çend komîsyonên din jî bên avakirin û bi vî awayî xalên ku di qanûnê de cîh digirin di pratîkê de bên pêkanîn. Gelê Amedê derbarê pêvajoya Aştî û Civaka Demokratîk, pratîzekirana Qanûna Çerçoveyî de ji ajansa me re axivîn.
Şêniyên Amedê anîn ziman ku pêvajoya Aştî û Civaka Demokratîk bi keda Rêberê Gelê Kurd Abdullah Ocalan hatiye vê astê. Welatiyan diyar kir ku êdî ew dixwazin bi awayekî wekhev û demokratîk jiyana xwe bidomînin û ev yek gotin: “Em dixwazin êdî şer çênebe, bila dewleta Tirkiyeyê berpirsyariya xwe bizanibe. Em dixwazin êdî bila xwîn nerije. Bila dayikên kesî negirîn, bila demokrasî were vî welatî.”
Welatiyên Amedê destnîşan kirin ku 2 sal e pêvajoya aştiyê dest pê kiriye û tu xwîn nehatiye rijandin, ev jî cîhê kêfxweşiyê ye û wiha gotin: “Ji bo pêşketina xebatên aştiyê, divê şertên azadiya fîzîki ya Rêberê Gelê Kurd Abdullah Ocalan werin pêkanîn.”
