Hevseroka DADê Zeynel Kete di panela Elewiyan de diyar kir ku Elewî bi xwezayî aştî û civaka komînal di nav xwe de dihewînin û wiha got: “Em wek Elewî dixwazin bibin kirdeya pêvajoyê.”
Komaleyên Demokratîk a Elewiyan (DAD) li ser aştî, civaka demokratîk û Elewîtiyê li navenda şaxa TUMBEL-SENê ya Enqereyê panel li dar xist. Hevserokê DADê Zeynel Kete wek axiver tev li panelê bû. Welatiyên Elewî û endam û nûnerên saziyên sivîl û partiyên sivîl jî tev li panelê bûn. Di eywane de pankartên li ser “Aştî Cema herî bi pîroz e ku 72 gel tev li dibe” û “Rêya Heq, di şibaka Elewiyan de aştî û demokrasî” hat daliqandin. Her wiha posterên Seyîd Riza û Hz. Elî jî hatin daliqandin.
Li beriya axaftinan çira hatin pêxistin û Gulbang hat hişyar kirin.
Modetoriya panelê Hevserokê şaxa DADê ya Enqereyê Mûstafa Karabudak kir û xêrhatina beşdaran kir.
Piştre Hevserokê DADê Zeynel Kete axivî.
’Rêya Heq civakekî aştiyê diparêze’
Zeynel Kete anî ziman ku civaka aştî bi xwezayî di nav Elewiyan de heye û wiha got: “Em vê karê yên ku herî baş dizanin nîn in. Lê em dixwazin dema ku civaka demokratîk tê avakirin Elewî çi difikirin, wî bînin ziman. Em bizanibin Elewî hebûnê çawa dinirxînin, aştiyê çawa dinirxînin. Dayika min digot nûrekê ronahiyê ‘Ana Fatma’ hebû ew nûr bi xwe re cihekê ku xwe bide nasîn digeriya û got ji me re cihekê lazim e û bû ba, hewa, av, agir û hebûn, ew ruh hebûnê ava kir. Ew ruhê ku ji Ana Fatmayê hatiye, hebûna xwezayê ye. Elewî ji hebûneke aştiyê, ekolojîk û wekhev bawer dikin. Bi xwezayî ew bawerî di nav Elewiyan de heye. Hebûn ji xwe xwazayî ye, rêya heq ew e.”
’Elewî dixwazin bibin kirde ye aştiyê’
Zeynel Kete bal kişand ser pêvajoya aştî û civaka demokratîk û diyar kir ku ew wek Elewiyan dixwazin bibin kirdeya pêvajoyê û wiha dawî li axaftina xwe anî: “Dema komar ava bû, li vî erdnîgariyê gelên cuda û baweriyên cuda heta astekî hatin cem hev. Heta Makezagona sala 1924an, bihevrebûna ku di nav gel de hebû kir yek rengî. Me vî komarê bi hev re ava kir. Pişre yek rengî serdest bû, gel û baweriyên cuda rastî cihekariyê hatin. Komkujî li ser wan gelan hate kirin. Di 27ê Sibata 2025an de birêz Ocalan bangawaziyek kir û pêvajoyeke nû dest pê kir. Ev ji bo herêmê bingeha aştiyê ye. Dema çek hatin şewitandin ez ji li vir bûm. Li ser sê gavan pêvajoyeke nû dest pê kir. Yek ji wan hiqûqa yekpare ku hemû kesan digire nav xwe ye. Divê ew Makezagona yekperest bê guhertin. Divê hemû ol û baweriyên din, civakên din jî xwe di nav de bibînin. Ya din jî entegrosyona pozîtîf e. Xwestin bi komkujiyan gelên bindest tune bikin. Pişre tunekirina bi texsît xistin meriyetê. Entegrasyona negatîf li ser wan gelan meşandin. Elewî bi xwezayî ew cihekariye qebûl nakin. Ya din jî avakirina komînalê ye. Ew jiyana komînal di nav Elewiyan de bi salane tê jiyîn. Di qazana xwarinê yê Hecî Bektaşî Welî de hezaran mirov xwarin dixwarin. Em wek elewî di avakirina civaka demokratîk û aştiyê de xwe wek kirde dibînin. Elewî hem bi dîroka xwe hem felsefe û rêxistina xwe dixwazin di avakirina civaka demokratîk de bibin kirde.”
Panel piştre bi pirs û bersivan bi dawî bû.
