Rêberê Gelê Kurd Abdullah Ocalan derbarê civîna ewil a Desteya Şopandin û Tespîtê û îdia û tawanbariyên derheqê xwe de peyamek belav kir. Ocalan wiha got: “Lîjneya ji bo pêvajoyê duh yekemîn civîna xwe pêk anî. Ev nîşan dide ku pêvajo bi gavên zexm pêşve diçe. Em gihîştine qonaxek krîtîk. Gotin û îdiayên ku derbarê min de li ser medyayê û medya dîjîtal tên belavkirin ne rast in. Ev parvekirin tevgerên provokatîf in ên dijberên pêvajoyê ne.”
Rêberê Gelê Kurd Abdullah Ocalan, derbarê yekemîn civîna Desteya Şopandin û Tespîtê ya ku di çarçoveya “Qanûna xurtkirina hevgirtina neteweyî û yekparebûna civakî” hate lidarxistin û derbarê îdia û tawanbarîyên nerast ên van çend rojên dawî li ser medyaya dîjîtal de belav dibin, daxuyinek ji bo bi raya giştî re were parvekirin, şand ber destê Heyeta DEM Partî ya Îmraliyê.
Peyama Abdullah Ocalan bi vî rengî ye:
“Birêz Serokkomar û birêz Devlet Bahçelî îradeya xwe bi awayek xurt nîşan dan.
Li ser bangewaziya min, têkoşîna çekdarî bi dawî bû. Partiyên siyasî jî piştgirîya dîrokî dan. Bi vî awayî ‘Qanûna xurtkirina hevgirtina neteweyî û yekparebûna civakî’ hat pejirandin.
Lijneya ku li gorî vê qanûnê hat avakirin, duh yekemîn civîna xwe pêk anî. Ev nîşan dide ku pêvajo bi gavên zexm pêşve diçe. Em gihîştine qonaxeke krîtîk. Di vê serdema dîrokî de hin derdor hewl didin pêvajoyê têk bibin. Ev hewlên wan komploya li dijî min e.
Gotin, dîtin, nav, belge û notên ku di medyayê û medyaya civakî de belav dibin û bi min ve tên girêdan, ne rast in. Ev parvekirin tevgerên provokatîf ên dijberên pêvajoyê ne.
Ez ê hewldanên xwe yên ji bo avakirina aştiya civakî û hiqûqa xwişk û biratiyê hîn zêdetir li pêş bixim.
Ez her kesî û her alî vedixwînim ku bi ruhê xwişk û biratiyê, bi hişmendî û bi hestiyarî nêzîk bibin û hewl bidin.
25ê Tebaxê 2026
Abdullah Ocalan”
