Badê hêrişê Îsraîlî yê vera qerargehê hewayî yê Ebû Dihûr yê Sûrîye, mabenê Îsraîl û Tirkîya de nakokîyê zêdeyêr benê. Wezîrê Pawitişî yê Îsraîlî Yisrael Katz ewro îfade kerd ke Serekkomarê Tirkîya Recep Tayyîp Erdogan, Sûrîye de,Tirkîya erzeno mîyanê rewşêka tehluke û wina vat: “Îsraîl do destûr nêdo ke tu het ewleyîya înan tehdît bikero.”
Îsraîlî, 18ê tebaxa 2026î de, qerargehê hewayî yê Ebû Dihûr yê Sûrîye bombarduman kerd. Badê bombardumanî serekwezîrê îsraîlî Benjamîn Netanyahu vat ke Îsraîlî hîşyarî dayo Sûrîye ke nêverdano estbîyayîşê leşkerî yê Tirkîya qerargahî de bibo. Netanyahu îfade kerd ke peymana înan zelal a û înan Şam agahdar kerdo ke nê hetî ser aver meşêrênê.
Rojê badê hêrişî, Tirkîya îdiayanê Îsraîlî yê vera xo red kerd û vat “Îdiayê Îsraîlî bê binge yê.”
Wezîrê Pawitişî yê Îsraîlî Yisrael Katzî ewro îfade kerd ke Serekkomarê Tirkîya Recep Tayyîp Erdogan, Sûrîye de, Tirkîya erzeno mîyanê rewşêka tehluke û vat: “Îsraîl do destûr nêdo ke tu het ewleyîya înan tehdît bikero.”
Wezîrê karanê teberî yê hukumetê demkî yê Sûrîye, Esed El Şeybanî, vizêrî vatbi, Şamî, Îsraîlî rê bi delîl îzah kerd tu planê awankerdişê qerargehêko leşkerî yê Tirkîya Ebû Dihûr de çin o. El Şeybanî îfade kerd ke qerargeh newe ra yeno hedrekerdene ke hetê hêzanê hewayî yê Sûrîye ra bêro xebitnayene.
El Şeybanî vat, leşkerê Tirkî, çarçewaya perwerde û hemkarîya leşkerî ya mabenê her di welatan de, zîyaretê qerargehî kerdibi, la tu hêzê leşkerî yê Tirki tîya çin ê. Sewbîna îfade kerd ke qerargeh hetanî dereceyêko gird veng bi û hema kar tede dest pênêkerdo.
El Şeybanî, roportajêkê xo yê keyepelê Axiosî de wina vat: “Niyetê awankerdişê qerargehêk yê Tirkîya tîya de çin o û ne zî bicakerdişê estbîyayîşêko leşkerî yo daîmî yê Tirkîya yan zî hêzê Tirkîya tîya de çin ê.”
El Şeybanî, îfade kerd ke maneyê meşrû yê Îsraîlî çinê ke qerargehî bombarduman bikero.
Çimeyê agahdarî, eşkera kerd ke serekê Mossadî yê Îsraîlî Roman Gofman, 14ê tebaxe de yan zî verê hêrişê vera qerargehê Ebû El Dihûr de bi rayîrê telefonî, El Şeybanî reyde qisey kerd û Sûrîye de estbîyayîşê leşkerî yê Tirkîya ser o munaqeşe kerdbi.
Goreyê çimeyan, Gofman persê zêdebîyayena estbîyayîşê leşkerî yê Tirkîya û piştîdayîşê artêşê Sûrîye bi çek û dronan kerdê.
