Platforma Şiyar Be rêzeçalakiyên xwe yê Pêngava Rabin îro li taxa Yenîkoyê ya navçeya Rezanê berdewam kir. Di çalakiyê de wiha hat gotin: “Bi xurtkirina civaka demokratîk em dikarin pirsgirêka tiryakê biqedînin.”
Platforma Şiyar Be ku li dijî tiryak û hişbirê têkoşînê dimeşîne, li ber avahiya Pirtukxaneya Erebê Şemo ya li taxa Yenikoyê ya navçeya Rezanê ya Amedê civîna gel li dar xist. Aktîvîsta TJAyê Ayla Akat Ata, Hevşaredarê Rezanê Sîraç Çelîk, Hevberdevkê Platforma Şiyar Be Murat Kan, Parlamentera Amedê Ceylan Akça Cupolo, nûnerê saziyên sivîl û nişteciyên taxê tevli civînê bûn. Di axaftinan de têkoşîna li hemberî madeyên hişbirê hat dubarekirin.
Destpêka axaftinê Sîraç Çelîk kir û armanca avakirin Platforma Şiyar Be ji gel re got û wiha axivî: “Em bangawaziyê walî û midûrê emniyetê dikin ku werin alikariya me bikin. Em tenê weke platformê nikarin, divê em bi hev re li hember tiryakê têbikoşin. Divê em nerazîbûna xwe bi hev re bînin ziman.”
Murat Kan jî qala pêywira gel kir û got: “ Çiqasî weke Platforma Şiyar Be em berpirsyar xuya bikin jî berpirsyarê yekem gel e. Hewceye em bi hev re têbikoşin. Ev pirsgêrek heta nava mala me ji hatiye. Armanca van polîtîkayan ew e ku me ji kokê me dûr bixin. Em ê bi kedekî kolektîf li hemberî van pirsgirênka bisekinin.”
Paşê gel mafê axaftinê girt û soza pişgiriya xebata Pêngava Rabin kirin.
Ceylan Akça Cupolo qala hevdîtina duh bi walî û midûrê emniyetê re kir û got “Ew talîmatan ji Enqereyê digrin, lê em armanc dikin ku em bi hev re ser bikevin. Bi xurtkirina civaka demokratîk em dikarin pirsgirêka tiryakê biqedînin.”
Ayla Akat Ata jî ji bo çaresekirina pirsgêrêka madeyên hişbirê pêşniyar ji gel xwest û got: “Heger em bi hev re nebêjin Rabin, heger em bi hev re kar nekin em nikarin bi ser bikevin. Divê en bi hev re taxan, kolanan û parkan biparêzin. Me ji walî û midûrê enmiyetê re got divê ew jî alîkariya me bikin. Lê hevalên me yên li hemberî tiryakê têdikoşin girtin. Niha nava kesên ji ber firotina madeyên tiryakên hatine girtin de dimînin û ewlehiya wan tuneye.”
