Ciwanên bi navê Hejar Başer, Mazlûm Dogan Sarikaya û Fûrkan Koç ku duh bi hinceta ‘Li dijî qanûna meş û xwepêşandanan derketine’ hatin girtin, ji girtîgehê peyam şandin û diyar kirin ku ew û kesên ji ber madeyên hişbirê hatine girtin li heman odeyê tên ragirtin.
Koma Alîgirên Amedsporê ya bi navê KuçeAmed û ciwanan ji bo piştevaniya pêngava ‘Rabin’ ku Platforma Şiyar Be li dijî hişbir û fihûşê dabûn destpêkirin li Qada Batikentê ya navçeya Bajarê Nû ya Amedê di 5ê Tebaxê de ji bo sê rojan çalakiya nobedê li dar xisti bûn. 6 ciwanên ku tev li çalakiya nobetê bûn di 9ê Tebaxê de hatibûn binçavkirin. Ciwanên bi navê Hejar Başer, Mazlûm Dogan Sarikaya, Mûhammed Şakar, Fûrkan Koç, Mûrat Aslan û Suleyman Ay ku li Miduriyeta Polîsan a Amedê îfadeyên wan hate wergirtin duh sewqî dadgehê hatin kirin. Hate diyarkirin ku ciwan bi îdiaya ‘Li dijî qanûna meş û xwepêşandanê derketine’ û ‘birîndakirinê’ hatine binçavkirin. Ji 6 ciwanên sewqî Edliyeya Amedê hatibûn kirin Hejar Başer, Mazlûm Dogan Sarikaya û Fûrkan Koç ji heman îdiayan hatin girtin û ew şandin Girtîgeha Amedê.
‘Çi dibe bila bibe em ê vî bajarî ji polîtîkayên şerê taybet paqij bikin’
Hejar Başer, Mazlûm Dogan Sarikaya û Fûrkan Koç bi rêya parêzerên xwe ji Girtîgeha Amedê peyam şandin. Ciwanan di peyamên xwe de anîn ziman ku ji ber ku ew li dijî bikaranîna madeyên hişbirê sekinîne weke cezayekê ew şandine girtîgehê û dan zanîn ku niha di nava kesên ku ji ber madeyên hişbirê hatine girtin de tên ragirtin. Ciwanan di peyamên xwe de destnîşan kirin ku çi dibe bila bibe dê vî bajarî ji politîkayên şerê taybet paqij bikin.
‘Em serbilind in’
Hejar Başer di peyama xwe de wiha got: “Em ji ber ku li dijî firoşkarên madeyan sekinîn û me hevalên xwe yên ciwan ji bengîtiya madeyên hişbirê dûrxistine em kirin hedef û em girtin. Em serbilind in û em dizanin ku li derve bi hezaran hevalên me dê têkoşîna me bidomînin. Em baş in û bimoral in. Şert û merc çi dibe bila bibe em ê vî bajarî ji politîkayên şerê taybet paqij bikin. Bijî Berxwedana Ciwanan”
‘Serê me mîna Çiyayê Zagrosê bilind e’
Mazlûm Dogan Sarikaya jî di peyama xwede bang li ciwanan kir û wiha got: “Silav ji hemû ciwanan re. Banga me ji bo parastina gel û ciwanan e. Serê me bilind e mîna Çiyayê Zagrosê, dilê me zelal e mîna Cîlo û Çarçela. Em keyfxweş in û em ê têkoşîna xwe mezin bikin. Doza me giran e em ê li ber xwe bidin.”
‘Bijî berxwedana ciwanan’
Fûrkan Koç jî di peyama xwe de qala rewşa xwe û hevalên xwe kir û wiha got: “Ez îro vê nivîsê bi serbilinî dinivîsim. Em ji we jî sekneke bi heman şiklî dixwazin. Qet mereq nekin em her sê jî weke şêran li ser piyan e. Qet gumana me tune ye ku hûn ê mafê me bi awayekî herî baş biparêzin. Bijî berxwedana ciwanan.”
