‘Qanûnê çarçewa’ ke pêşkeşê meclîsî bîyo, hetê çapemenîya mîyanneteweyîye ra, nêzdî ra ame teqîbkerdene. Xeylê sazgehanê çapemenîye agahî dayê ke, qanûnê çarçewa do rojanê ameyoxî de bibo qanûn.
Çarçewaya Prosesê Aştî û Komelê Demokratîk de, ‘qanûnê çarçewa’ yo bi nameyê “Xurtkerdişê Piştîdayîşê Milî û Pêameyîşê Komelkî de” ame hedrekerdene û pêşkeşê Serekîya Meclîsî ame kerdene. Medyaya mîyanneteweyî, averşîyayîşê ke na babete reyde girêdaye yê, nêzdî ra taqîp kena û xeberanê xo de ca dayê pêşnîyazê qanûnî.
Ewilî ajansê Reutersî ke merkezê ey Brîtanya de yo, averşîyayîşî girewte rojevê xo. Reutersî xeberanê xo de erjna ke amancê nê qanûnî de peynîardişê pêkewtişan est o. Sewbîna xebere de ame vatene ke pêşnîyazê qanûnî, hetê zaferî endamanê meclîsî ra yeno piştgîrîkerdene û yeno hêvîkerdene ke no hewte qanûn meclîsî ra derbas bibo.
Xeberê Reutersî hetê xeylî sazgehanê medyaya mîyanneteweyîyan ra zî ame weşanayene; mîyanê înan de The Arab News ê Sûdî Erebîstanî, The Jerusalem Post ê Îsraîlî, US News û The Washington Post ê DYA, The Star ê Malezya û The Straits Times ê Sîngapurî est ê.
Associated Press (AP) ke merkezê ey DYA de yo zî xebera xo de ca da averşîyayîşan û qalê eşkerayîya Serekê Grûbê AKP’yî yê Meclîsî, Andullah Gulerî kerd. Xebere de ame dîyarkerdene ke yeno pawitiş ke pêşnîyazê qanûnî badê erjnayîşê Komîsyonê Edaletî, verê ke meclîs bikewo betlane, na aşme de bibo qanûn.
‘Gamêka muhîm a’
United News of Indîa ke merkezê ey Hîndîstan de yo, xeberanê xo de ca dayo teklîfê madeyan ê qanûnî. Xebere de taybetî ameyo dîyarkerdene ke yeno pawitiş ke pêşnîyazê qanûnî no hewte bibo qanûn. Sewbîna, nê averşîyayîşan prosesê peynîardişê pêkewtişan û averberdişê aştî de sey gamêka muhîme ame erjnayene.
Peşnîyazê qanûnî de derheqê Abdullah Ocalanî de nêbîyayîşê tenzîmkerdişêk bi babeta rojevî
The Teranga Times ke merkezê ey Senegal de yo zî teklîfê qanûnê girewt rojevê xo û bale ante nê çî ser o ke pêşnîyazê qanûnî de derheqê Rayberê Şarê Kurdî Abdullah Ocalanî de tu tenzîmkerdişêk ca nêgirewto.
La Voce di New York ke merkezê ey DYA de yo zî, pêşnîyazê qanûnî ke derheqê Abdullah Ocalanî de tu tenzîmkerdişêk nêkerdo, manşetê xebera xo sey “Pêşnîyazê qanûnî yo ke Abdullah Ocalanî teberê çarçewa de verdeno” daye.
