Şaredariya Farqînê bi armanca pêşîlêgirtina bikaranîna madeyên hişbir û bûyerên sûc, li navçe û gundewaran 50 avahiyên terkkirî rûxandin. Şaredariyê ji bo têkoşîna li dijî tiryakê banga mezinkirina piştevaniyê li ciwan û jinan kir.
Xebatên Şaredariya Farqînê ya Amedê ji bo parastina tenduristiya gel û aramiya civakê berdewam dikin. Di çarçoveya xebatên ku ji aliyê tîmên Gerînendetiya Karên Fenî ve tên meşandin de, li navenda navçeyê 20 û li taxên gundewarî jî 30, bi giştî 50 avahiyên terkkirî hatin rûxandin. Bi rûxandina van avahiyên terkkirî yên ku demeke dirêj e nayên bikaranîn û hatiye tesbîtkirin ku bi demê re zemînê ji bo bikaranîna madeyên hişbir, fuhûş û bûyerên cihêreng ên sûc amade dikin, tê armanckirin ku tax veguherînin qadên bi ewletir.
Her wiha Şaredariya Farqînê di çarçoveya xebatên xwe yên li dijî bikaranîna hişbirê de jî diyar kir ku di têkoşîna li dijî tiryakîbûnê de ne nêzîkatiyeke cezakirinê lê belê feraseteke ku piştevanî û jiyanê xurt dike esas digirin û wiha got: “Di heman demê de, em li Navenda Piştevaniya Jinan a NUDEMê li benda wan jinan in ku dixwazin ji xizmetên piştgiriya psîkososyal, şêwirmendî û piştevaniyê sûd werbigirin. Têkoşîna herî xurt a li dijî tiryakîbûnê; mezinkirina piştevaniyê, xurtkirina hêviyên ciwanan û gihandina wan a bi perwerde, huner, werziş û hilberînê re ye. Wekî Şaredariya Farqînê, em ê di vê rêyê de her tim li cem gelê xwe bin.”
