Nobeta ke vera Şaredarîya Wanî ya Şaristanê Girdî de ameya destpêkerdene, roja 3. de zî hewayê serdî de zî dewam kena. Şaredarî, waştişê şarî ser o şayîya ciwanan organîze kena.
Vera cezaya 3 serrî û 9 aşmî ke Hemşaredarê Şaredarîya Wanî ya Şaristanê Girdî ya DEM Partî Abdullah Zeydanî rê ameya dayene, nobeta ke vera şaredarîye de dest pêkerda roja 3. de dewam kena. Saetanê şewe de ke germê hewayî hetanî binê sifirî 10 dereceyan kewt zî coşê şarî nêvindert. Ciwanan, adiro de ke wekerdbi dormeyê ey de bi saetan govende girewte. Tayê şar zî zereyê şaredarîye de karton yan zî sandalyeyan ser o nobeta xo tepişte. Hemşaredarê Şaredarîya Wanî ya Şaristanê Girdî Neslîhan Şedal û Abdullah Zeydan û Hemşaredara Şaredarîya Amedî ya Şaristanê Girdî Dogan Hatun zî ciwanan reyde sohbet kerd û şewe vîyarnaye.
Do şayîya ciwanan bêra viraştene
Badê nobeta ke heta serê sibayî dewam kerd, taştî ameye kerdene. Waştişê ciwanan ser o qerar ame dayene ke vera şaredarîye de têresayîşê ciwanan bêro organîzekerdene. Seke yeno zanayene hunermendê herême do şayî de ca bigîrê. Hemşaredarî Şedal û Zeydan zî do şayî de qisey bikerê. Reyna mîyanê roje de taxan de zî do vera ceza de aktîvîteyê cîya-cîyayî bêrê organîzekerdene.
