Di festîvala Depê ya ku bajarê Mazlum Dogan e hat lidarxistin de bi hezaran kesan Mazlum Dogan bi bîr anî. Her wiha bang hat kirin ku ji bo Pêvajoya Aştî û Civaka Demokratîk bigihêje serkeftinê, divê têkoşîn bê mezinkirin.
Li navçeya Depê ya Xarpêtê, di çarçoveya Festîvala Xweza û Çandê ya Depê ya 2026an ku ji aliyê Şaredariya Depê ve tê organîzekirin de konserek hat lidarxistin. Di konsera ku li Baxçeyê Gel hat lidarxistin de, aktivîsta Tevgera Jinên Azad (TJA) Ayla Akat Ata, ji Sekreteriya Îmraliyê Veysî Aktaş, nûnerên rêxistinên civakî yên sivîl, nûnerên partiyên siyasî û bi hezaran welatî beşdar bûn.
Hevşaredara Depê Eda Durmuş diyar kir ku şaredariyên ku bi destkeftiya têkoşîna jinan hatine qezenckirin, di avakirina demokrasiyê de rolek girîng dilîzin û wiha got: “Ev bajar ê me hemûyan e, em ê geşepêdana bajarê xwe bi hev re pêk bînin. Festîval ne tenê ji şahiyê pêk tên. Festîval kodên çandî yên jiyana nû, ruhê kolektîf ê asoyê me yê civakî hildigirin paşerojê û motîfên jiyana civakê di nav xwe de dihewînin.”
‘Em ê li pey îradeya aştiyê bimeşin’
Hevşaredar Cafer Ogur jî anî ziman ku rewşa wan bi hêz e û ev tişt gotin: “Rewşa me bi hêz e. Tiştên ku me kiribin, em ê hêj bêtir bikin. Em bi Şaredariya Uskudarê re bûn şaredariyên bira. Îro dê şaredarê wan jî di nav me de biba. Lê belê bi awayekî bê hiqûqî hat girtin. Ev pratîk zirarê didin aşitiyê. Pêwîst e ku ev yek di cih de bi dawî bibe. Em ê şopdarên wê îradeya aşitiyê bin ku Birêz Ocalan derxistiye holê.”
Piştî axaftinan, bi rêzê ve Azad Bedran, Silbûs û Tarî û Erol Berxwedan derketin ser dikê. Di konsera ku coşeke mezin lê hebû de, gelek caran dirûşmên “Bijî Serok Apo” û “Jin, Jiyan, Azadî” hatin berzkirin. Beşdaran bi hev re berhema ku li ser yek ji kadroyên pêşeng ê PKKê û ji Depê ye Mazlum Dogan hatiye nivîsandin, gotin.
Hunermendên ku derketin ser dikê jî bang kirin ku ji bo Pêvajoya Aştî û Civaka Demokratîk û bigihêje serkeftinê divê têkoşîn bê mezinkirin. Konser bi govend, dirûşm, çepik û tilîliyan bi dawî bû.
