Endamê Konseya Rayberdişî ya KCKyî Mustafa Karasuyî ard ziwan ke averşîyayîşê demokratîkî tim pê têkoşînê komelî bîyî û vat gerek şar û hêzê demokrasî mîyanê Prosesê Aştîye û Komelê Demokratîkî de aktîf ca bîgirê.
Endamê Konseya Rayberdişî ya KCKyî Mustafa Karasuyî ke programêkê taybetî yê Medya Haberî de cewab da persanê Erdal Erî, derheqê pêvînayîşê peyênî yê Rayber Apoyî, qanûnê çarçewa ke rayapêroyîye de yeno munaqeşekerdene û meseleya elwîyan de erjnayîşî kerdî.
Karasuyî îfade kerd ke seba ke meseleya seserran bêro çareserkerdene Tirkîya de pîya bi partîyanê sîyasîyan, dezgehanê demokratîkan û rêxistinanê komelê sîvîlî reyde zî gerek pêvînayîş bêro kerdene û vat: ”Dinya de averşîyayîşê demokratîkî tim pê têkoşînê komelî bîyî û vat gerek şar û hêzê demokrasî mîyanê Prosesê Aştîye û Komelê Demokratîkî de aktîf ca bîgirê.”
Karasuyî ard ziwan ke pîya bi Prosesê Aştîye û Komelê Demokratîkî rewşa Rayber Apoyî hinî sey verî nêbena û vat: ”Eke rewşe bibo sey verî, no prosesê averberdişî nêeşkeno aver şiro. Hem têkîlîya ci bi rayrapêroyî çîn a, hem nêeşkeno bi çapemenîye xîtabê şarî bikero, têkîlîya ci bi ma çîn a. Eke rewşe wina dewam bikero, xora proses avêr nêşino. Gerek dewlete nê bizano. Gerek hinî na babete de gamêke bêro eştene. Ma xo ra azadîya Rayber Apoyî wazenê. Verî gerek azad û serbest bixebito, dima ra zî zaf derg mekero, Raybe Apo gerek bibo azad.”
Karasuyî derheqê qanûnê çarçewa de zî nê vatî: ”Meseleya kurdan nêeşkena sey meseleya asayîşî bêro destgirewtene. Qanûno newe zî gerek bi tewirê winayênî nêro hazirkerdene. Bi averşîyayîşê prosesî çekî eşkenê bidîyê kişt la gerek mesela têna sey meseleya çekronayîşî nêro vînayene. No nizdîbîyayîşo raşt nîyo. Na babete de senî ke ma makul û ciddî nizdî benî, gerek dewlete û îqtîdar zî wina nizdî bibê.”
Karaysuyî derheqê zextê dewlete yê vera elewîyan de nê vatî: ”Gerek têkoşînê demokrasîyî de elewîyî tewr vernî de vinderê. Pê vatişanê îqtîdarî azadîye nêbena. Têna bi têkoşînê demokrasîyî azadîya bawerîye eşkena bêro caardene. Demokrasî seba elewîyan babetêka îbadetî ya. Eke demokrasî bêro caardene, Tirkîya bibo demokratîk bawerî zî bena azad.”
