Berdevka DEM Partiyê Ayşegul Dogan derbarê hevdîtina dawî ya bi Rêberê Gelê Kurd Abdullah Ocalan re anî ziman ku Abdullah Ocalan diyar kiriyê ku stratejiya ew dixwaze li pêş bixe stratejiya sed salî ye.
Heyeta DEM Partiyê ya Îmraliyê ku ji parlamenter Pervîn Buldan, Mîthat Sancar û parêzer Faîk Ozgur Erol pêk dihat, di 20ê Tîrmehê de li Girava Îmraliyê bi Rêberê Gelê Kurd Abdullah Ocalan re hevdîtin pêk anî. Di hevdîtinê de Rêberê Gelê Kurd Abdullah Ocalan li ser qanûna çarçoveyî nirxandin û peşniyarên xwe kir. Berdevka DEM Partiyê Ayşegul Dogan derbarê hevdîtina bi Abdullah Ocalan re ji nûçegihana JinNewsê Melek Avci re axivî.
Abdullah Ocalan: Ev stratejiya sed salî ye
Ayşegul Dogan destnîşan kir ku Rêberê Gelê Kurd Abdullah Ocalan ji bo pêşxistina pêvajoyê berpirsyariyeke mezin girtiye ser xwe û ji bo pêşketina pêvajoyê gavên dîrokî avêtiye. Ayşegul Dogan diyar kir ku di hevdîtina dawî de Rêberê Gelê Kurd Abdullah Ocalan nirxandinên girîng kirine û wiha got: “Birêz Ocalan dibêje; ‘Stratejiya em bi pêvajoya Aştî û Civaka Demokratîk pêş dixin, ne stratejiyeke demkî ye, lê stratejiya sed salî ye’. Birêz Ocalan vê weke firsendeke dibîne û dibêje divê ev firsend baş bê nirxandin. Birêz Ocalan ji bo xwedîderketina pêvajoyê banga li hemû kesan dike. Bixwe jî biryardariya xwe ya ji bo pêvajoyê ji heyetê re ragihandiye. Birêz Ocalan dixwaze kêmasiyên tifaqa Kurd û Tirk temam bike û sed salên windabûyî bi paş ve bi dest bixe.”
‘Em li bendê ne li ser pêşnûmeyê lihevkirinek pêk bê’
Ayşegul Dogan li ser qanûna çarçoveyî jî axivî û diyar kir ku divê pêşnûme bi fikreke hevpar ji Komîsyona Edaletê û Desteya Giştî ya Meclisê re bê şandin û ev yek anî ziman: “Ev yek wê hem pêvajoyê li pêş bixe û hem jî xetereyan kêm dike. Ji bo wê jî em li bendê ne li ser pêşnûmeyê lihevkirinek pêk were. Em jî dizanin tenê bi çêkirina qanûnekê pirsgirêka sed salî ya Kurd çareser nabe. Em ji destpêkê ve dibêjin; piştî qanûna çarçoveyî divê di qanûnan de jî sereratkirin bê kirin. Divê di qanûna înfazê, Qanûna Têkoşîna Li Dijî Terorê (TMK) û Qanûna Cezayê ya Tirk (TCK) de guhertin were kirin. Pêvajo bi hewcedariya jiholêrakirina van qanûnan dest pê kiriye.”
