Şaxa Komeleya Mafên Mirovan (ÎHD) a Şirnexê ji bo xwezayê li Silopya nobeta edaletê girt.
Şaxa Komeleya Mafên Mirovan a Şirnexê (ÎHD) Nobeta Aştiya Civakî û Xwişk-Biratiyê ku di hefteya 10emîn de berdewam dike bi boneya parastina xwezayê li Parqa Bêastengiyê ya navçeya Silopya li dar xist. Parlementerê DEM Partiyê yê Şirnexê Mehmet Zekî Îrmez, endam û rêveberên partiyên siyasî û saziyên civakî gelek kes tev li nobetê bûn.
Li hember gavên Tevgera Azadiyê dewlet bêdeng e
Di destpêka nobetê de Hevserokê ÎHDê yê Şirnex Şivan Sakman bal kişand ser Pêvajoya Aştî û Civaka Drmokratîk û wiha axivî: “Vaye salekî pêtir e li welatê me pêvajoyek tê meşandin. Di çarçoveya vê pêvajoyê de ji aliyê PKKê ve gav hatin avêtin û ev gav gelekî girîng bûn. Li ser gava çekşewitandinê re salek derbas bû lê li hember van gavan ji aliyê dewletê ve gavek şênber nehatiye avêtin. Diviya li hember gavên PKKê avêtine dewletê piçûk bûya jî hin gav avêtiban.”
Edalet û demokrasî ji bo her qada civakê hewce ye
Piştî Şivan Sakman, Hevserokê DEM Partiyê yê Şirnexê Ramazan Ûysal got ku ji bo parastina xwezayê divê gelê me rabe ser piyan û wiha axivî: “Edalet û demokrasî ji bo her qada civakê hewce ye. Çawa îro pêvajoyek ji bo çareserkirina pirsgirêka Kurd dimeşe, divê em ji bo parastina xwezayê jî bernameyekî bidin pêşiya xwe û edaletê ji bo xwezayê jî bixwazin.”
Divê gelê me li hember talana xwezayê bêdeng nemîne
Berdevka Dayîkên Aştiyê ya Silopya Asya Tay bal kişand ser nexweşiyên ji ber santralên termîkê zêde bûne û wiha got: “Îro mirov li bajêrê Silopya dinêre di her malekî de nexweşek ê penceşêrê heye, ev yek ji ber talana xwezayê pêk tê. Divê em li hember vê talanê bêdeng nemînin.”
Divê pirsgirêka ekolojîk neyê paşguhkirin
Berdevkê Platforma Ekolojiyê yê Şirnexê Tahîr Cîn diyar kir ku dema ew parastina ekolojiyê dikin heman demê de parastina mafê jiyana mirovan jî dikin û wiha got: “Em bi parastina xwezayê, parastina mafên jinê, parastina mafên zarokan, parastina mafên civakê dikin. Li bajarên me ji çar aliyan ve xwe tê talankirin, li hember vê yekê berxwedanek heye lê mixabin ev berxwedan ne encamgir e. Îro pêvajoyek tê meşandin lê li kêleka vê pêvajoyê parastina xwezayê tê paşguhkirin. Îro rêjeye nexweşiyên penceşêrê li Silopya gehiştiye asta herî jor, di rojên pêşde li hember vê santrala penceşêrê çêdike çalakiyên cudatir bikin.”
Piştî axaftinan nobet bi dawî bû.
