Enqere – Yek jî maxdurê KHKê Alî Karadogan diyar kir ku pêvajoya Aştî û Civaka Demokratîk ji bo çareserkirina pirsgirêkan fersendeke û wiha got: “Heta Pirsgirêkên civakî çareser nebin, pirsgirêkên kesayetî jî çareser nabin.”
Rêxistinên kêd û demokrasiyê, dê ji bo kesên bi biryarên KHKê ji peywîrê hatinê dûrxistin bi dirûşma “Em karê xwe dixwazin” di 17ê Tirmehê de li ber Wezareta Dadê daxuyaniyê bidin û piştrê jî dest bi çalakiya nobedê ya 24 seatan bikin. Maxdurên KHKê yên ji bajarên Bakurê Kurdistanê û Tirkiyeyê dê tev li çalakiyê bibin. Alî Kardogan ku ê mamostetiya ziman û wêjeya Tirkî dikir, di sala 2016an de bi biryarên KHKê ji peywîrê hat dûrxistin, piştî erdheja Mereşê ji Semsûrê koçî Elihê dike. Mexdurê KHKan û erdhejê Alî Karadogan derbarê çalakiyê û armanca çalakiyê axivî.
‘Ji ber mafdar in me li ber xwe da’
Alî Karadogan bi lêv kir ku ew bi vê çalakiyê dixwazin dengê xwe bigihînin berpirsyaran û wiha axivî: “Desthilatê darbe ji bo zextên ser hezên demokrasiyê zêdetir bike weke firsendek dît. Li ser van kirinan 10 sal derbas bûn lê ji sedî 80yê hevalên me hêj venegeriyane li ser karê xwe. Yek jî ji wan ez im. Em jî ji bo mafên xwe dixwazin çalakî li darbixin û dengê xwe derxin. Yên ku bi KHKan ji peywirê hatine dûrxistin û yên dixwazin pişgiriyê bidin dê tev li vê çalakiyê bibin. Em ê piştî daxuyaniyê dest bi çalakiya nobedê 24 seatan bikin. Em dixwazin vê bêedaletî û bêhiqûqiyê nişan bidin. Em ne sûcdar in lewma jî me her tim li ber xwe da. Me tu car dev ji xebatan berneda.”
‘Sedema pirsgirêkan nebûna demokrasiyê ye’
Di berdewama axaftina xwe de Alî Karadogan diyar kir ku ew bi hinceta avakirina KURDÎ-DERê ji peywîrê hatiyê dûrxistin û wiha pê dê çû: “Pêvajoya Aştî û Civaka Demokratîk pirgirêkên em dijîn dikare çaraser bike. Ew pêvajo, her çiqas wekî em dixwazin bi rê ve neçe jî, pir girîng e. Heke ew welat demokratîk bibe mafên mamoste, karker, cotkar, zarok û jinan jî dê pêk were. Ji ber ku yek jî avakarê KURDÎ-DERê bûm ji peywîrê hatim dûrxistin. Lê me KURDÎ-DER li gor zagonên Tirkiyeyê ava kir. Divê hemû kes bi ziman û nasnameya xwe bijî. Ji bo wê jî heke ew pêvajo bi awayekî serkêftî encam bibe, gelek pirsgirêkên me dê çareser bibin. Sedema pirsgirêkên em dijîn nebûna demokrasiyê ye. Heta pirsgirêkên civakî çareser nebin pirsgirêkên kesayetî jî çareser nabin.”
‘Divê hemû hêzên demokratîk piştgiriyê bidin’
Di dawiya axaftina xwe de Alî Karadogan xwest her kesek tev li çalakiya wan bibe û wiha bang kir: “Yên ji vê pergalê ne razî ne divê bizanibin ku ev pirsigrêk yên me hemûyan e. Em ji nîşka ve nikarin hemû pirsgirêkan çareser bikin lê gav bi gav ji bo çareseriyê em ê bixebitin. Em çareseriya pirsgirêkên hemû kesan dixwazin. Ji bo wê werin em bi hev re pirsgirêkan çareser bikin. Hemû sazî, rêxistin, partiyên siyasî û hêzên demokratîk bila tev li çalakiya me bibin û piştgiriyê bidin.”
