Fermandarê Giştî yê HSDê Mazlûm Abdî, Serokê Partiya Demokratîk a Kurdistanê (PDK) Mesûd Barzanî û Cîgirê Serokwezîrê Herêma Kurdistanê Qûbad Talabanî, ji ber koça dawî ya Senatorê Amerîkî Lindsey Graham peyamên serxweşiyê weşandin; her sê lîderan li ser dilsozî û piştgiriya Graham a ji bo doza gelê Kurd sekinîn û diyar kirin ku Kurdistan dê tu carî vê dostaniyê ji bîr neke.
Senatorê Komarparêz ê Dewletên Yekbûyî yên Amerîkayê (DYA) Lindsey Graham, ku di qada navdewletî de wekî yek ji piştgirên herî naskirî yê gelê Kurd bû, 11ê Tîrmehê di 71 saliya xwe de ji nişka ve jiyana xwe ji dest da.
Piştî Lindsey Graham jiyana xwe ji dest da Fermandarê Giştî yê HSDê Mazlûm Abdî, Serokê Partiya Demokratîk a Kurdistanê (PDK) Mesûd Barzanî û Cîgirê Serokwezîrê Herêma Kurdistanê Qûbad Talabanî, ji ber koça dawî ya Lindsey Graham peyamên serxweşiyê weşandin.
Ebdî: Rola wî ya ji bo Sûriyeyeke dadperwer dê di dîrokê de bimîne
Fermandarê Giştî yê Hêzên Sûriya Demokratîk (HSD) Mazlûm Ebdî li ser koça dawî ya senatorê Amerîkî xemgîniya xwe anî ziman û wiha got: “Karûbarê wî yê berfireh, lîderiya wî ya xwedî prensîb, piştgiriya wî ya bêdawî ji bo Kurdan û parêzvaniya wî ya bêhempa ji bo Sûriyeyeke aştiyane û dadperwer dê di dîrokê de bê nexşandin.”
Barzanî: Gelê Kurdistanê dê wî bi rêzdarî bi bîr bîne
Serok Giştî yê PDKê Mesûd Barzanî jî di peyama xwe de bîranîna Graham bilind nirxand û diyar kir ku ew dostekî rastî yê Kurdan bû û ev yek anî ziman: “Navê wî û piştgiriya wî ya bêdawî ji bo mafên rewa yên gelê Kurdistanê, dê her tim ji aliyê gelê Kurdistanê ve bi rêzdarî bê bibîranîn. Ez hevparê xema malbata wî ya birêz im.”
Talabanî: Kurd tu carî dostên xwe ji bîr nakin
Cîgirê Serokwezîrê Herêma Kurdistanê Qûbad Talabanî jî bal kişand ser wefadariya gelê Kurd a ji bo Graham û ev peyam da: “Gelê Kurd tu carî dostên xwe ji bîr nake. Em ê wî ji ber piştgiriya wî ya bêhempa û dilsoz a bi doza Kurd re, bi hurmet bi bîr bînin. Serê malbata wî û gelên Amerîkayê sax be.”
