Enqere – Piştî Lûtkeya NATOyê çavê raya giştî li pêvajoya Aştî û Civaka Demokratîk e. Tê payîn ku hefteya pêşiya me geşedanên girîng biqewimin. Li bendeyê ye ku Heyeta DEM Partiyê ya Îmraliyê biçe Girava Îmraliyê û bi Rêberê Gelê Kurd Abdullah Ocalan re hevdîtinê bike û derbarê qanûna çarçoveyê de jî geşedanên nû biqewimin.
Pêvajoya Aştî û Civaka Demokratîk ku rojeva sereke ya Bakurê Kurdistanê û Tirkiyeyê ye, li benda geşedanên girîng e. Piştî Lûtkeya NATOyê ya di 7-8ê Tîrmehê de li Enqereyê hate lidarxistin, tê payîn di çarçoveya pêvajoyê de geşedanên girîng rû bidin. Nîqaşa sereke ya pêvajoyê; qanûna çarçoveyê ye. Li ser qanûna çarçoveyê gelek nîqaş û nûçe tên belavkirin. Nîqaşa sereke ya li ser qanûna çarçoveyê ew e ku bi Rêberê Gelê Kurd Abdullah Ocalan re bê nîqaşkirin û bi vî awayî bê rojeva Meclisê. Her wiha tê gotin ku divê qanûna çarçoveyê di nav gerîlayên Tevgera Azadiyê de neyê kategorîzekirin.
Çavê raya giştî li Meclisê ye
Serokê Meclisê Numan Kurtulmuş di daxuyaniyeke xwe de diyar kiribû ku qanûna çarçoveyê dê nebe qanûna efûyê. Li ser vê yekê Rêveberiya Tevgera Azadiya Kurdistanê jî daxuyaniyek da û xwest ku qanûna çarçoveyê neyê derxistin û stratejiya Abdullah Ocalan pêk were. Ji aliyê din ve jî Heyeta DEM Partiyê ya Îmraliyê ku nêzî 50 roj in bi Rêberê Gelê Kurd Abdullah Ocalan re hevdîtin nekiriye jî rojeva sereke ya siyaseta demokratîk e. Li bendê ye ku hefteya pêşiya me di çarçoveya pêvajoyê de geşedanên girîng rû bidin. Di salvegera şewitandina çekan a Koma Aştî û Civaka Demokratîk de çavê raya giştî jî li Meclisê û avêtina gavên qanûnî ye.
‘Heke qanûna çarçoveyê weke ku hatiye muzakerekirin neyê rojevê dê xetereyan derxe’
Rayedarên DEM Partiyê diyar dikin ku ev pêşnûmeya qanûna çarçoveyê di 24ê Gulanê de bi Rêberê Gelê Kurd Abdullah Ocalan re hatiye muzakerekirin û li gorî muzakereyê divê qanûn di nava gerîlayên Tevgera Azadiyê de kategoriyê neke û hemû gerîlayan bigire nav xwe.
Her wiha rayedarên DEM Partiyê hişyariyê jî didin û dibêjin heke qanûna çarçoveyê weke ku hatiye muzakerekirin neyê rojevê dê li pêşiya pêvajoyê xetereyan derxe. Her wiha Rêveberiya Tevgera Azadiyê jî di daxuyaniya xwe de diyar kir ku heke qanûna çarçoveyê; statuya Rêberê Gelê Kurd Abdullah Ocalan mîsoger neke ew vê yekê qebûl nakin û hişyarî da ku heke qanûna çarçoveyek bi vî rengî were ew ê xwedî bi helwest bin.
Di pêvajoyê de hefteya krîtîk
Her wiha hat zanîn ku hefteya pêşiya me pêşnûmeya qanûna çarçoveyê dê biçe ber destê partiyên siyasî û li ser pêşnûmeyê nîqaş bên kirin. Piştî nîqaşan dê pêşnûme ji aliyê Heyeta DEM Partiyê ya Îmraliyê ve ji bo erêkirina Rêberê Gelê Kurd Abdullah Ocalan biçe Girava Îmraliyê û bi Abdullah Ocalan re bê nîqaşkirin. Li bendê ye ku piştî van nîqaşan qanûna çarçoveyê were rojeva Meclisê.
