Rêveberiya Polîtîkayên Jinan a Şaredariya Bismilê, projeya xwe ya “Komuna Çandiniyê” da destpêkirin. Rêveberiya Polîtîkayên Jinan da zanîn ku bi van xebatan keda jinan dê were dîtin û piştevanî dê were esas girtin.
Rêveberiya Polîtîkayên Jinan a Şaredariya Bismilê ya Amedê bi armanca ku jin di pêvajoyên hilberînê de diyarkertir bin û piştevaniya aborî bê mezinkirin, li Bostanê Jinan a Nûjînê projeya xwe ya “Komuna Çandiniyê” da destpêkirin. Bi vê pêngava nû re, zeviyên şaredariyê bi keda kolektîf a jinan ji nû ve zindî dibin.
Xebatên komunê li zeviyeke çandiniyê ya 4 donimî ya şaredariyê dest pê kirin. Di qonaxa destpêkê ya xebatan de, bi tevlîbûn û pêşengiya 5 jinan, di 9ê Hezîranê de bamye û xiyarên kornîşonê hatin çandin. Komuna Çandiniyê ya ku hatiye avakirin, ne tenê weke qadeke çandiniyê ya asayî tê dîtin; ev proje di heman demê de weke modelek hilberîna kolektîf, qada parvekirina ezmûnan û stendina biryarên hevpar kete meriyetê. Jin di vê komunê de hem keda xwe dikin yek hem jî piştevaniya di navbera xwe de xurttir dikin.
‘Xebatên ku keda jinê berçav dikin û piştevaniyê esas digirin’
Rêveberiya Polîtîkayên Jinan destnîşan kir ku ew ê piştgiriya xwe ya ji bo hilberîna domdar bidomînin û got: “Em ê xebatên ku keda jinê berçav dikin û piştevaniyê esas digirin, bênavber bidomînin. Ji qonaxa çandinê heta dema dirûn û berhevkirinê, tevahiya pêvajoya hilberînê dê bi tevlîbûna çalak a jinan bê birêvebirin. Bi vê yekê re armanc ew e ku tecrubeya hilberînê ya jinan bê dewlemendkirin û çanda keda hevpar li nava civakê belav bibe.”
