DBP’yî semedê sergêra 89. ya qetilkerdena rayberanê azadîye Alîşêr û Zarîfe hesabê xo yê medya dijitale de yew eşkerayîya vîrardişî pare kerde. Eşkerayîye de ame vatene ke: “Wa çimê înan pey de nêmanê, mîraswerê înan ewro têkoşînê înan hîna berz kenê û vera zulmkarî bi şeklêko xurt xover danê.”
Partîya Herêman a Demokratîkan (DBP) seba vîrardişê Alîşêr û Ana Zarîfe nê çî vatî:
“Di şervanê azadîye, di serkêşê têkoşînê bêhempayî Alîşêr û Ana Zarîfa naye ra 89 serran verî ameyî qetilkerdene. Her di kesayetê ke wayîrê heskerdişê şarê xo û bawerîya cuya azade bîyî, tarîxê kurdan de mîrasêko mende verada.
Vîrê înan têna vîrê di kesan nîyo; vîrê têkoşînê estîye û îradeyê cuya rûmetdar o. Cesaret, qerardarî û fedakarîya înan hertim ma rê rayberîye kenê; rayîrê ma roştî kenê û hêzê pîlî danê ma.
Ma ewro têna înan nêyanê xo vîrî; eynî wext de vengdayîşê înan ê seba pawitişê ziwanan, kulturan, heqanê merdiman û aştîye yad kenê. Wa çimê înan pey de nêmanê, mêraswerê înan ewro têkoşînê înan hîna berz kenê û vera zulmkarî bi şeklêko xurt xover danê.
Ma verê vîrameyîşê Alîşêr û Ana Zarîfa de sereyê xo çewt kenê; înan bi rêzdarî û hesrete anê vîrê xo.”
Alîşêr û Ana Zarîfe Xatûne kamê?
Alîşêr û Zarîfa Xatûne Rayberê xoverdayişê Koçgîrî yê serra 1921î bîyî. Alîşêr bi nasnameyê xo yê ozanîya şarî zî yeno şinasnayene, cinîya ey Zarîfa Xatûne zî cinîyêka kurd a leşkerî û sîyasî bîye. Tena sey cinî û mêrde nê ey hemrayê yewbinî bî û koyanê Kurdîstanî de pîya tewrê têkoşînê çekdarî bîyî.
Rolê înan o tarixî oyo ke Alîşêr îdeolog û rayberanê xoverdayişê Koçgîrî ra yew bî. Goreyê vatena Nûrî Dersimî, Zarîfa Xatûne wendene û nuştene zanitêne, stratejîyanê leşkerî û sîyasîyan de serdest bîye. A paştdayoxa tewr pîl û şêwirmenda Alişêrî bîye.
Di embazê têkoşînî, 9ê Temmuza 1937î de wexto ke herêma Dersimî de bîyî, pûsîyêka xayîne de ameyî kiştene û sereyê înan ameyî birnayene.
Cuyê înan, xoverdayîş û mergê înan o trajîk hafizaya şarê Kurd û Elewîyan de bi vate û destanan heta ewro ameya.
