Amed – Welatiyên ku li TOKÎyên Oglakliyê dijîn ji ber pirsgirêkên heyî bi gazinc in. Welatiyan dan zanîn ku pirsgirêkên çûn û hatinê, av û binesaziyê hene û ji bo çareserkirina pirsgirêkên bang li saziyên berpirsiyar ên bajêr kirin.
Piştî erdhêjên ku di 6ê Sibata 2023yan de li navçeya Bazarcixa Mereşê û Hatayê pêk hatin û bandora xwe li 11 bajaran kir, xelk mexdûr kir. Yek ji van bajaran jî Amed bû. Li Amedê ji ber erdhêjê gelek avahî hilweşiyan 414 kesan jiyana xwe ji dest dan û 902 kes jî birîndar bûn. Pîştî salek bi ser erdhejê re derbas bû, li gelek cihan ji aliyê TOKÎyê ve dest bi çêkirina avahiyan hate kirin. Li Taxa Oglakli ya navçeya Rezanê jî zêdetirî 13 hezar avahî hatin çêkirin û tê plankirin ku ev hejmar bigihe 17 hezaran. Lê tevî ku avahî hatine çêkirin û teslîmî welatiyan hatine kirin jî gelek kêmasiyên wan hene. Li avahiyên ku hatine çêkirin pirsgirêkên binesazî, çûn û hatinê, av, binkeya tenduristiyê, paqijî û nebûna bazarê hene. Niştecihên TOKÎyê ku ji ber kêmasiyên li herêmê dijîn bi astengiyên mezin re rû bi rû dimînin ji ajansa me re axivîn û diyar kirin ku ji ber rewşa heyî ew mexdûr dibin.
‘Em bi tena serê xwe hiştin’
Yek ji niştecihên herêmê Memdûha Ayata da zanîn ku pirsgirêkên wan pir in û gazincên xwe wiha anîn ziman: “Li vir ne bazar heye, ne nexweşxane, ne jî pirsgirêka rîngê çareser dibe. Şaredarî pirsgirêkên me çareser nake. Her tişt kêm e. Gava em ketin xaniyan, gotin her tişt amade ye. Lê em li bi tena serê xwe hiştin. Em bist deqîqe-nîv saetê li benda rîngê, saetek, saet û nîv em li benda otobusên bajêr dimînin. Em dixwazin nexweşxane, binkeya tenduristiyê, dikan bên avakirin. Ji bo bazarê, dermanxane û nexweşxaneyê û ji bo her tiştî em diçin navendê.”
Bi sedan kes li otobusekê siwar dibin
Welatiyê bi navê Ahmet Ozer ku ew jî li TOKÎyên Oglakliyê dijî anî ziman ku pirsgirêkên wan pir zêde ne û wiha axivî: “Em pir rezîl bûn, em qet ne memnûn in. Pirsgirêka veguhastinê, ya rêveberiyê, nebûna avê û paqijiyê heye. Pirsgirêka herî mezin veguhastin e. Însan li vir rezîl dibin. Bila şaredarî an Wezareta Hawirdorê çareyekê bibînin. Mifte dan me, lê 5-6 meh in em di nava rezîliyê de ne. Ez bang li Erdogan dikim, bila çareyekê bibîne. Ew pere û aîdatan dixwazin, lê di ortê de tiştek tune ye. Rêveberiya TOKÎyê bila dest bi kar bike. Otobusek tê, sed kes bi ser hev siwar dibin. Ev nabe. Em dixwazin demên otobusan bikin deh-panzdeh deqîqe.”
‘Ji bo 13 beşan tenê bazarek heye’
Sedat Pamuk jî bal kişand ser pirsgirêkên hawirdorê û wiha got: “Sererastkirina hawirdorê tune ye. Pirsgirêka veguhastinê, nexweşxane û bi taybetî ya bazarê heye. Di rewşeke normal de divê di hefteyê de 3 caran bazar çêbibe lê li vir ji 13 beşan re tenê bazarek heye. Ew jî pir dûr e. Em daxwaz dikin ku sererastkirina hawîrdorê çêbibe û nexweşxane were vekirin. Pêwîst e şaredarî darên li vir av bide, lê av tune ye. Em di nava zehmetiyeke mezin de ne.”
‘Dar zûha bûn, av tune ye’
Welatiyê bi navê Îrfan Teyfûr jî anî ziman ku ji ber nebûna avê darên ku hatine çandin hemû hişk bûne û got: “Li vir pirsgirêk pir in. Ne dar tên avdan, ne paqijî heye, ne jî veguhastin. Dar hemû zûha bûn. Av tune ye, hin roj hene ku qet av nayê. Bi şev û bi roj di her otobusekê de mirov li ser pişta hev diçin. Em dixwazin otobûsên piçûk, dolmîş werin, dar werin avdan û hawirdor were sererastkirin.”
Niştecîhên TOKÎyê yên Oglakliyê bang li rayedaran, Şaredariya Bajarê Mezin a Amedê û Wezareta Hawirdor, Bajarvanî û Guherîna Avhewayê kirin ku dengê wan bibihîzin û van pirsgirêkên bingehîn di zûtirîn demê de çareser bikin.
