Yekîtiya Ragihandina Azad (YRA) bi daxuyaniyekê dest bi kampanyaya ‘Em Xwedî li Ronahî TV Derkevin’ kir.
Di 12yê Adarê de agir bi avahiya kanala Ronahî TV ketibû û studyoya sereke ya televizyonê, odeya kontrolê (rejî) û hemû alavên teknîkî yên bingehîn şewitîbûn. Di encama vê şewatê de weşana zindî ya kanalê heta çend saetan hatibû rawestandin.
Ji bo piştgirîdayîna televîzyona Ronahî TV û peydakirina tiştên teknîkî Yekîtiya Ragihandina Azad (YRA) bi dirûşma ‘Em xwedî li Ronahî TV derkevin’ kampanyek da destpêkirin. Derheqê kampanyayê de YRAyê daxuyanî da.
Di daxuyaniyê de hat diyarkirin ku di encama şewata 12yê adarê li avahiya kanala Ronahî TV a Qamişloyê ket de gelek ziyanek mezin gihiştiye saziya ragihanê ya Ronahî TV ku ji destpêka şoreşê ve bûye dengê şoreşa gelan û ev tişt hat gotin: “Ronahî TV ji destpêka weşana xwe ve di 12yê Mijdara 2011an de, ji bo belgekirin û veguhestina bûyeran û her wiha ji bo firehkirina çarçoveya ragihandina herêmî, bi zimanên Kurdî, Erebî, Îngilîzî û Suryanî kar kiriye. Kanalê toreke fireh a peyamnêran ava kiriye û li gelek herêman ofîs û şax vekiriye. Ev yek bûye sedema ku bandoreke erênî ya mezin li ser qada ragihandinê çêbibe û dengê civakên herêmê bigihîje raya giştî.
Ji ber berpirsiyariya me li hemberî sazî û dezgehên ragihandinê û baweriya me bi girîngiya berdewamkirina peyama wan, em Yekîtiya Ragihandina Azad (YRA) Kampanyaya ‘Em Xwedî li Ronahî TV Derkevin’ didin destpêkirin. Armanca vê kampanyayê dabînkirina alavên teknîkî yên ku di şewatê de wêran bûne ye; di nav wan de kamerayên televîzyonê, alavên montajê, pergalên kontrolkirina deng û dîmenan, komputer û hemû pêdiviyên teknîkî yên ji bo ji nû ve avakirin û xebitandina studyoyan hene. Ev kampanya armanc dike ku şert û mercên pêwîst ji bo destpêkirina dîsa ya weşana zindî û berdewamkirina karûbarê kanalê peyda bike.
Ev însiyatîfa ‘Em Xwedî li Ronahî TV Derkevin’ nîşana baweriya me ye ku parastina ragihandina azad û misogerkirina berdewamiya xebata wê berpirsiyariyek kolektîf e. Hevgirtina bi saziyên ragihandinê yên ku dibin hedefa êrîşan an rastî karasatan tên, di heman demê de parastina mafê civakê yê xwegihandina agahiyan û piştgiriya berdewamiya xebata çapemeniya profesyonel e.
Li ser vê bingehê, em bang li sazî û dezgehên ragihandinê, rêxistinên civaka sivîl, aliyên piştgir, xwediyên însiyatîfan û hemû kesên ku baweriya wan bi ragihandina azad heye dikin ku li gorî derfeta xwe beşdarî vê kampanyaya piştgiriyê bibin. Armanc ew e ku piştgirî ji bo ji nû ve avakirina binesaziya teknîkî ya Ronahî TV were peyda kirin, da ku kanal di zûtirîn dem de karibe weşana xwe ji nû ve dest pê bike û misyona xwe ya çapemeniyê berdewam bike.
Mekanîzmeyên wergirtina bexşînan, rêbazên beşdarbûna vê kampanyayê û mekanîzma zelal a birêvebirin û xerckirina çavkaniyên ku ji bo ji nû ve avakirina kanalê dê werin komkirin, em ê bi awayekî berfireh eşkere bikin. Armanc ew e ku hemû çavkaniyên hatine komkirin bi şêwazek zelal, berpirsiyar û ji bo vegerandina amadebûna teknîkî ya Ronahî TV bêne bikaranîn.”
