Karkerê Şaredarîya Şaristanê Girdî ya Wanî Mehmed Mamûk ke hetê qayûmu ra kar ra amebi eştiş hem betal mendo hem zî nêweşîyê kanserî ey de peyda bîya. Mehmet Mamûk hetkarî wazeno û vano: “Badê ke kemoterapîyê mi qedîya, ez do emelîyat bibî. Ez hetkarîye wazena.
Wan de 15ê sibata 2026î de tayînkerdişê qayûmî ra dima Hemşaredar Neslîhan Şedal û Abdullah Zeydan karî ra ameybî dûrîkewtiş. Qayûm, 29ê temmuza 2026 de 223 karkerî kar ra vetîbi. İnan ra xeylî karkerî, demê qayûmê 2019î de zî raştê eynî caardişan amebî û dima ra Neslîhan Şedal û Abdullah Zeydan ê reyna girewtêbî kar. Qayûm ke îradeyê şarî xesp kerd, bi eynî hawa zî karkerî kar ra vetî. Karkerê ke kar ra ameyê vetiş, xeylî problemanê ekonomî ra rîbirî mendê.
Badê kar ra vetişi ra nêweşîya kanserî ey de peyda bî
Ê karkeran ra yew zî Mehmed Mamûk ke Şaredarîya Şaristanê Girdî ya Wanî de Mudurîyetê Karê AFAD’î de xebitîyenê, no beno di rey ke karî ra yeno vetiş û nika zî bi nêweşîye girane ra rîbirî mendo. Tewr peyîn 6 aşmî verê, doktoran teşhîsê kanserî mesaneyî kerdo. Mehmed Mamûk, demêke Wan de tedawî dîyî, nika seba tedawî şino Anqara û yeno. Şîyayîşûameyîşê Anqara hetê ekonomîye ra problemêko girdo seba Mehmet Mamûk û tedawîya ey asteng kena. Badê tedawîya kemoterapî, do Mehmed Mamûk emelîyat bibo, seba nê emelîyatî zî mîlyonêk pere lazim o.
Xêrwaştoxan ra hetkarîye waşt
Vetişê karî ra dima rewşa weşîya Mehmed Mamûk xerabêr kerd û hetê aborîye ra zî kewto mîyanê tengayî. Mehmed Mamûk ke ajansê ma rê behsê rewşê xo kerd û vengdayîşê hetkarîye kerd. Mehmed Mamûk derheqê rewşa xo de wina vat: “Ez karkerê Şaredarîya Şaristanê Girdî ya Wanî ya. Ez û 220 embazê mi kar ra ameyê eştiş. Nêzdî 6 aşmî yo ke nêweşîya kanserî mi de peyda bîya. Ez seba tedawîya nêweşîya xo şina Anqara, tedawîya kemoterapî vînena. Seba şîyayîşûameyîşê xo ê Anqara xeylî zehmetî ancena. Badê kemoterapî, ez do emelîyat bibî. Ez hetkarîye wazena.”
