Serekkomarê Tirkîya Recep Tayyîp Erdoganî derheqê prosesê Aştî û Komelê Demokratîkî de îfade kerd ke ê serê qanûnê çarçewa de xebitîyenî û wina vat: “Dimayê dayîşûgirewtişanê laziman, ma zaf derg nêkenî û do bîyarî rojevê meclîsî.”
Serekkomarê Tirkîya Recep Tayyîp Erdogan kombîyayîşê AKP’yî de qisey kerd.
Serekkomar Erdoganî qiseykerdişê xo de bal ant prosesê Aştî û Komelê Demokratîkî ser o û wina vat: “Ez wazena derheqê prosesê Tirkîyaya bêterore de tayê agahîyanê muhîman şima reyde pare bikera. Proseso ke hemkarê ma MHP’yî dayo destpêkeredene , bîyo polîtîkaya dewlete û qonaxê muhîmî derbaz kerdî. Rixmê provakasyonan zî ma bi hawayêko sebir nê prosesî rayra berd. Astengîyanê vernîya prosesî ra yew zî, problemê herêma vakurê Sûrîye bi. Labelê zafaneyê nê problemî zî hetê Serekkomarê Sûrîye birêz Şara ra ame çareserkerdene. Prosesê entegrasyonî rixmê tayê probleman zî bi hawayêko serkewte ard ca. Ma zî nê prosesî nêzdî ra taqîb kenê.”
Recep Tayyîp Erdoganî da zanayene ke ê qanûnê çarçewa ser o xebitîyenê û nê çîyî vatî:
“Krîzê Îranî tena seba welatê ma nê, seba wayûbirayanê ma yê kurdan zî zaf muhîm bi. Bi saya proses û kanalanê dîyalogî, vernîya fitneyan ame girewtene ke do wayûbirayê ma yê kurdî hîna zaf zerar bivînê. Ameyoxî de do hîna weş bêro vînayene ke ma sey kurd, tirk, treb û persan senî kayê sînsî veng vetî û welatê ma bobelatêko pîlî ra xelesîya. Ma zî waştêne nê problemê 50 serrî bilez çareser bîkerî. Labelê çi heyf ke hedîseyê herêma ma kerd ke ma bi hawayêko hesas û bi tedbîr bixebitîyê. Ma nika qanûnê çarçewa ser o xebitîyenê ke tasfîyeya rêxistinî lez bikero. Dimayê dayîşûgirewtişanê lazim, ma zaf derg nêkenî û do bîyarî rojevê meclîsî.”
