Dayika Aştiyê Hava Kiran û Hevberdevka Komîsyona Çand, Ziman û Hunerê ya DEM Partiyê Cemîle Tûrhalli banga beşdariya “Mitînga Azadiyê” li gel kirin û xwestin ew roj li qadê cih nemîne û hemû dinya li Kurdan temaşe bike.
Bi pêşengiya DEM Partî, DBP û TJAyê dê ji bo azadiyê fizîkî ya Rêberê Gelê Kurd Abdûllah Ocalan di 27ê Hezîranê de li Wanê û Mersînê û di 28ê Hezîranê de jî li Amed û Stenbolê bi dirûşmeya “Bi Rêbertiya Azad ber bi Azadiyê ve Dimeşin” li dar bixin. Mitînga li Amedê ew ê di 28ê Hezîranê de li Qada Îstasyonê ya navçeya Bajarê Nû ya Amedê saet di 17:00an de dest pê bike. Hevseroka DBPê ya Giştî Çîgdem Kiliçgun Ûçar û Siyasetmetdarê Kurd Veysî Aktaş ew ê weke axaftvan tev li mitîngê bin. Her wiha hunermend Kurd Kadîr Çat, Pinar Aydinlar û Serhado jî di mitîngê de stranan bibêjin. Ji bo mitîngê bi rojane ku li gelek bajarên bakurê Kurdistanê û Tirkiyeyê xebat tên kirin.
Dayika Aştiyê Hava Kiran û Hevberdevka Komîsyona Çand, Ziman û Hunerê ya DEM Partiyê Cemîle Tûrhalli banga beşdariya mitîngê li gel kirin û gotin ew dixwazin ew roj gelê Kurd qadê vala nehêle.
‘Em di rojên kirîtîk de derbas dibin’
Dayika Aştiyê Hava Kiran ji bo tevlibûna mitînga azadiya fîzîkî ya Rêberê Gelê Kurd Abdullah Ocalan pêk bê li gel kir û wiha got: “Di 28ê mehê de em ê li Qada Îstasyonê mitîngek li dar bixin. Mitînga ji bo azadiya rêberê rêberan Rêberê Gelê Kurd birêz Abdullah Ocalan e. Divê ew bi awayek fizîkî bigihîje azadiya xwe. Ew azad bibe wê deriyên heps û zindanan vebibe, divê maf û hebûna wî bê mîsogerkirin. Da ku ew jî azad bibe û di nava gelê xwe de azad bijî. Em ji gelê xwe ricayê dikin. Bila qadê vala nehêlin û bila cih li wê qadê nemîne. Divê em li hebûna xwe û li rêberê xwe bibin xwedî. Ew îro hebûn û tunebûna me ye. Em di rojên kirîtîk de derbas dibin. Divê ew roj hemû dinya me bibîne û bibêje, li hebûna xwe û li serokê dibin xwedî.”
Hevberdevka Komîsyona Çand, Ziman û Hunerê ya DEM Partiyê Cemîle Tûrhalli banga beşdariya mitîngê li gel kir û wiha got: ”Gelê me yê hêja, divê em hemû ji bo mitînga ku wê di 28ê mehê de bê lidarxistin, em dixwazin hûn jî tev li mitîngê bibin. Ji bo ‘Rêbertiya azad û civaka demokratîk’ banga me li gelê me ye, ku ew roj qadê vala nehêlin û tev li mitîngê bibin.”
