Festîvala ke hetê şaredarîyanê DEM Partî ya qezanê Wanî ra bi sloganê “Festîvala Keda Berardişî ya Cinîyan” yena organîzekerdene û do 3 rojan dewam bikera, Qada Şaristanî de dest pêkerd.
Wan de “Festîvala Keda Cinîyan û Berardişî ya Cinîyan” ke hetê 12 şaredarîyanê DEM Partî yê qezayanê Wanî ra û bi serektîya Şaredarîya Rêya Armûşî yena kerdene, bi heyecanêko pîl dest pêkerd. Festîvale de Hemşaredara Wanî ya Şaristanê Girdî Neslîhan Şedal û Heşaredara Mardînî ya Şaristanê Girdî Devrîm Demîr zî tede, zaf cinî amade bîyê.
Destpêkê festîvale de Hemşaredara Rêya Armûşî Canan Uzunay qisey kerd û bal ant xurtkerdiş û asayîşê keda cinîyan ser o û wina vat: “Ma wazenî eşkera bikerî ke heta ke keda cinîyan nêasê û cinî heqê keda xo nêgêrê, do têkoşînê ma dewam bikero. Seba ke cinî warê keda xo de biresê encamêko rast, ma do her tim mîyanê karûxebatî de bibî.”
‘Ganî keda cinîyan pêro cayan de bêrê vînayene’
Hemşaredarê Şaredarîya Wanî ya Şaredarîya Girdî Neslihan Şedal zî bal ant muhîmîya festîvale ser o û dîyar kerd ke ganî keda cinîyan pêro cayan de bêra vînayene. Neslîhan Şedal behsê polîtîkayanê qeyûman zî kerd û wina vat: “Wexto ke ma şaredarî girewtî, ma vat ke ma do pîya cinîyan reyde şaredarîyanê xo rayra berê. Labelê qeyûman tewrê verê cû sazgehê ma yê cinîyan padayî. Dimayê polîtîkayanê qeyûman, polîtîkayê şerê taybetî zî yenê rayraberdene; Kurdîstan de rîyê nê polîtîkayanê şerê taybetî ra hedîseyanê Gulîstan Doku, Îpek Er û Narîn Guran qewimîyayî. Ma tîya ra reyna vanî; vera pêro polîtîkayanê şerê taybetî do têkoşînê ma bi qerardarî dewam bikero.”
Cinîyan deyîran reyde govende girewt
Dimayê qiseykerdişan, Grûba Govende ya Nûdayî sehne girewt. Dima ra cinîyan stantan ra gêrayê û berhemê xo mojnayê. Cinîyan cinîyan reyde govende girewte û kay kerd.
Festîvale do şand saete 17:00î de bi konserê deyîrbaz Zozan Alp dewam kerd.
